Ponda Death Case: कन्हैय्याकुमारचा खुनी सापडणार कधी? संशयिताची न्यायालयीन कोठडीत रवानगी

फोंड्यातील कन्हैय्याकुमार याच्या खून प्रकरणी मायणा कुडतरी पोलिसांनी कर्नाटकमधील ट्रकचालक वासुदेव मदार याला अटक केली असली, तरी त्याचा या खुनात हात असल्याचा कुठलाही पुरावा पोलिसांच्या हाती लागलेला नाही. आता पोलिसांकडे या संशयिताची अधिक चौकशी करण्यासारखे काहीच बाकी न राहिल्याने त्याची आज न्यायालयीन कोठडीत रवानगी केली आहे.

फोंडा पोलिस स्थानकातील बंद पडलेले सीसीटीव्ही कॅमेरे पुन्हा कार्यरत करण्यात आल्याची माहिती हाती लागली आहे. २४ जून रोजी या कॅमेऱ्यांत काय चित्रित झाले हे तपासण्यासाठी तज्ज्ञांचे सहकार्य घेत असल्याची आता माहिती मिळाली आहे.

२४ जूनच्या रात्री फोंडा पोलिसांनी कन्हैय्याकुमार याला ताब्यात घेतले होते. फोंडा पोलिसांच्या रॉबर्ट व्हॅनमधून त्याला मध्यरात्रीच्या सुमारास लोटली येथे आणून सोडले होते. त्याच रात्री त्याचा मृत्यू झाला होता. सुरवातीला हे प्रकरण अपघाती मृत्यू म्हणून नोंद केले होते, पण मयताच्या अंगावर तीक्ष्ण हत्याराने वार केले असल्याचे दिसून आल्यावर नंतर या प्रकरणी खुनाचा गुन्हा नोंद केला होता.