वेळ दुपारची, स्थळ बांदोडा येथील ढवळीकर यांचे घर, प्रचार दौऱ्यावर असलेले मुख्यमंत्री डॉ. प्रमोद सावंत तेथे येतात. जेवण सुरू करणार तेवढ्यात अप्रिय विषय समोर येऊन आदळतो, पण मुख्यमंत्री हसत हसत विषय टोलवतात.
पुन्हा असे होणार नाही, याबाबत ‘मगो’च्या नेत्यांना आश्वस्त करतात. काल सावर्डे मतदारसंघातील ‘मगो’चे नेते बालाजी ऊर्फ विनायक गावस यांना भाजपमध्ये प्रवेश दिल्याच्या पार्श्वभूमीवर हा संवाद झाला.
मिळालेल्या माहितीनुसार, विधानसभा निवडणुकीनंतर ‘मगो’ने भाजपची साथ देताना ‘मगो’चे नेते फोडले जाणार नाहीत, अशी हमी घेतली होती. लोकसभा निवडणुकीत दोन्ही पक्ष एकत्र असल्याने भाजपला ‘मगो’ची मते मिळणे ठरलेले आहे.
असे असताना भाजपने ‘मगो’च्या सावर्डे मतदारसंघातील बड्या नेत्याला आपल्याकडे वळवल्याने ‘मगो’ पक्ष नाराज झाला आहे. लोकसभेचा प्रचार दोन्ही पक्ष एकत्र करत असताना भाजपने ‘मगो’चा नेता पळवण्यातून चांगला संदेश जात नसल्याचे मगोच्या नेत्यांचे म्हणणे होते.
‘त्यांना’ बोलावले नव्हते, स्वेच्छेने प्रवेश’
याबाबत मगोचे अध्यक्ष दीपक ढवळीकर यांना विचारले असता ‘होय, मुख्यमंत्र्यांना आम्ही विचारणा केली’, असे त्यांनी सांगितले. भाजपने अन्य पक्षाचे नेते पक्षात घेतले तर राजकीयदृष्ट्या त्यांना सोयीचे ठरणार आहे.
मगो व भाजप एकत्र असल्याने अशा नेते आयातीचा काहीच फायदा होणार नाही, हे मुख्यमंत्र्यांच्या लक्षात आणून दिले. त्यांनीही भाजपने गावस यांना बोलावले नव्हते, तर त्यांनीच भाजप प्रवेशाची इच्छा व्यक्त केली होती, असा खुलासा केला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.