Mahadayi Water Dispute: सत्य काय ते शेवटी बाहेर आलेच; शहांनीच दिली कबुली

Mahadayi Water Dispute: म्हादईचा सौदा कर्नाटककडे करण्यात गोवा सरकारही भागीदार आहे, हा आम्ही जो आरोप करत होतो, तो आता सिद्ध झाला आहे. खुद्द केंद्रीयमंत्री अमित शहा यांनी तशी थेट ग्वाही दिली आहे.

सत्य काय ते शेवटी बाहेर आलेच, अशी प्रतिक्रिया गोवा फॉरवर्डचे अध्यक्ष विजय सरदेसाई यांनी व्यक्त केली आहे.

प्रमोद सावंत यांनीच म्हादईचा खून केला आहे. म्हादईचे पाणी वळविणे हा कर्नाटक आणि गोवा सरकारने घेतलेला संयुक्त निर्णय आहे, असे शहा यांनी म्हटले.

हे जर खरे नसेल तर मुख्यमंत्र्यानी केंद्रीय नेतृत्वाला जाब विचारावा, अन्यथा त्यांनी पदाचा राजीनामा द्यावा, असे आव्हान सरदेसाई यांनी दिले आहे.

कर्नाटकच्या पाणी पिपासू शेतकऱ्यांची तहान भागविण्यासाठी मुख्यमंत्री सावंत यांनी म्हादईचा गळा घोटला. हे सैतानी कृत्य आहे. आपली खुर्ची सांभाळून ठेवण्यासाठी त्यांनी गोव्यातील पुढील पिढीला दुष्काळाच्या गर्तेत नेऊन सोडले आहे.

मुख्यमंत्र्यांचा खोटारडेपणा बस्स झाला, आता त्या पदावर त्यांना राहण्याचा अधिकार नाही, असे सरदेसाई यांनी म्हटले आहे.