Mahadayi River: घरोघरी लागणार पणत्या; म्हादईप्रश्नी सरकारला जागे करण्यासाठी अनोखा उपक्रम

Mahadayi River: म्हादई रक्षणाबाबत गोवा सरकार पूर्णपणे झोपलेले असून या निद्रिस्त सरकारला जागे करण्यासाठी रविवारी 12 तारखेला प्रत्येक गोमंतकीयाने आपल्या घरासमोर मेणबत्ती किंवा पणती पेटवावी, असे आवाहन म्हादई बचाव मंचच्या सासष्टी विभागाने काल केले.

सासष्टी विभागाचे निमंत्रक सेराफिन कोता यांनी रविवारी सायंकाळी सात ते साडेसातच्या दरम्यान ही मेणबत्ती किंवा पणती पेटवावी जेणेकरून कदाचित या निद्रिस्त सरकारला जाग येऊ शकते. या निषेधाचे फोटो फेसबूक आणि इस्ट्राग्रामवरून शेअर करा, असे आवाहन केले.

यावेळी तारा केरकर, प्रतिमा कुतिन्हो, अँथनी डिसिल्वा, फ्रेडी त्रावासो, प्रशांत नाईक, ओलेंसियो सिमोईस, दुर्गादास कामत व अन्य आंदोलक उपस्थित होते.

हे आंदोलन आता सासष्टी तालुक्यात नेले जाणार असल्याचे सूतोवाच यावेळी कोता यांनी केले. म्हादई आटली तर त्याचे दुष्परिणाम दक्षिण गोव्यावरही होणार आहेत.

त्यामुळे दूधसागरही आटणार याची कल्पना लोकांना करून देण्यासाठी सासष्टी तालुक्यातील प्रत्येक गावात सभा आयोजित केल्या जाणार असून त्याद्वारे व्यापक जागृती करण्यात येणार असल्याचे त्यांनी सांगितले.

जोपर्यंत कर्नाटकचा डीपीआर मागे घेतला जात नाही तोपर्यंत आमचे आंदोलन चालूच राहणार असे त्यांनी सांगितले.