Ganesh Jayanti 2023 : माघी गणेश जयंतीनिमित्त संपूर्ण मुरगाव तालुका भक्तिमय

Ganesh Jayanti: श्री गणेशाचा जन्मोत्सव म्हणजेच श्री गणेश जयंती उत्सव बुधवारी मुरगाव तालुक्यात मोठ्या भक्तिमय वातावरणात साजरा करण्यात आला. काही ठिकाणी पुढील पाच ते आठ दिवस धार्मिक व सांस्कृतिक कार्यक्रमांची रेलचेल सुरू राहणार आहे.

पार्वतीचा पुत्र श्री गणेशाचा या तिथीला झाला म्हणून या दिवसाला गणेश जयंती उत्सव असे म्हणतात. मुरगाव तालुक्यात आज प्रत्येक गणपती मंदिरात हा उत्सव मोठ्या उत्साहात साजरा करण्यात आला.

त्यानिमित्त सकाळपासून धार्मिक विधींना प्रारंभ झाला. सकाळी श्रीचरणी अभिषेक झाला. नंतर श्री गणेश जन्मसोहळा, पाळणा, किर्तन, दुपारी महाप्रसाद झाला. पुरोहित तसेच महिला वर्गातर्फे पाळणागीत गाऊन गणेश जन्मसोहळा साजरा करण्‍यात आला.

संध्याकाळच्या सत्रात मंदिरांमध्‍ये भजनाचे कार्यक्रम झाले. नंतर रात्री श्रींची पालखी मिरवणूक दिंडीसह वाजतगाजत काढण्यात आली. मुरगाव तालुक्यातील सांकवाळ, दाबोळी, नवेवाडे, मांगोरहिल, शांतीनगर, बायणा, आल्त-रुमडावाडा, बोगदा येथे गणेश जयंती उत्सव साजरा करण्यात आला. शेकडो भाविकांनी श्रींचे दर्शन घेतले.

रात्री पालखी सोहळ्यास भाविकांनी मोठ्या संख्येने उपस्थिती लावली. श्रींची पालखी मिरवणूक मंदिरात आल्यानंतर आरती व तीर्थप्रसाद झाला. बोगदा येथील श्री गणपती मंदिरात दशावतारी नाट्यप्रयोगही झाला.