अवकाळी पावसाचा फटका, आंबा, काजू धोक्यात

पणजी : गोव्यात सध्या कडाक्याची थंडी पडत आहे. यासोबतच गेल्या आठवडाभरापासून अवकाळी पावसाचीही हजेरी गोव्याच्या विविध भागात पाहायला मिळाली. अवकाळी पावसामुळे काजू आणि आंबा पिकांचं मोठं नुकसान होण्याची भीती व्यक्त केली जात आहे. साहजिकच बागायतदार वर्ग चिंतेत पडला आहे. (Untimely Rain News Updates)

गोव्यात (Goa) अवकाळी पावसाने वर्दी दिल्याने उन्हाळी पिकं धोक्यात आली आहे. काजू, आंबा, फणस आदी पिकांना मोहोर धरला असतानाच पाऊस आल्याने काही ठिकाणी मोहोर झडल्याचं चित्र आहे. आधीच लांबलेल्या पावसामुळे (Rain) झालेलं नुकसान त्यात अवकाळीची हजेरी यामुळे गोव्यातील बागायतदार दुहेरी संकटात सापडला आहे. अवकाळी पावसामुळे आंबा, काजूच्या उत्पादनात घट होण्याची भीतीही व्यक्त केली जात आहे.

गोव्यात हवामानात (Weather) बदल होत असतानाच थंडीचा कडाका वाढतानाच दिसत आहे. त्यातच पाऊस पडल्याने मोहोरानंतरची फळं धरण्याची प्रक्रिया लांबण्याची शक्यता आहे. साहजिकच आंबा आणि काजू हंगाम लांबणीवर पडण्याची चिन्हं आहेत. मात्र सतत पाऊस पडत नसल्याने हातचं पीक जाणार नसल्याचंही बागायतदारांचं म्हणणं आहे.