रेजिनाल्ड, रुबर्ट यांच्या नावे सोशल मीडियावर खोटी पत्रके व्हायरल झाल्याने गोंधळ

Lok Sabha Election 2024: कुडतरीचे आमदार आलेक्स रेजिनाल्ड लॉरेन्स आणि रिव्हॉल्युशनरी गोवन्सचे (आरजीपी) दक्षिण गोवा लोकसभा उमेदवार रुबर्ट परेरा यांच्या नावे काल रात्रीपासून सोशल मीडियावरून खोटी पत्रके व्हायरल होऊ लागल्‍याने तो चर्चेचा विषय बनला होता. मतदानाच्या आदल्याच रात्रीपासून हा प्रकार घडल्याने दोन्ही नेत्यांनी हे कृत्य करणाऱ्यांच्या विरोधात संताप व्यक्त केला आहे. मात्र, यासंबंधी कुणीही पोलिसात (Police) तक्रार दाखल केलेली नाही.

दरम्यान, आरजीपीचे उमेदवार रुबर्ट परेरा यांनी गोव्याच्या भल्यासाठी लोकसभा निवडणुकीतून माघार घेतल्याचे खोटे पत्रक व्हायरल झाल्याने परेरा यांनी संताप व्यक्त केला.

मतदानाच्या आदल्या रात्री मी उमेदवारी मागे घेतली असल्याचे एक बनावट पत्रक समाज माध्यमांवर फिरू लागले. असे खोटे सांगून मते मिळवण्याची गरज विरोधकांना का पडली? कारण त्यांनी काहीच कामे केलेली नाहीत. काम न केल्यानेच चुकीच्या पोस्ट घालण्याची गरज पडली. या बनावट पत्रकाविरोधात तक्रार करून योग्य त्या चौकशीची मागणी केली जाणार आहे, असे त्यांनी सांगितले.