मडकई: मडकई पंचायतक्षेत्रातील गोमंतकीय नागरिकांना येथील औद्योगिक वसाहतीतील रोजगारात प्रथम प्राधान्य मिळावे, अशी जोरदार मागणी मडकई पंचायतीच्या करण्यात आली. मडकई आयडीसीत बहुतांश कंपन्या स्थानिकांना डावलून गोव्याबाहेरील लोकांना थेट रोजगार देतात, असेही यावेळी ग्रामस्थांनी सांगितले. या विषयावर जोरदार चर्चा होऊन स्थानिकांना शंभर टक्के प्राधान्य द्यावे, असा ठराव घेण्यात आला.
कर्नाटकात ज्याप्रमाणे तेथील काँग्रेस सरकारने स्थानिकांना नोकऱ्यांत शंभर टक्के प्राधान्य देण्याचा निर्णय घेतला आहे, त्याच धर्तीवर मडकई पंचायतीतील नागरिकांनाही रोजगारात प्रथम प्राधान्य द्यावे, अशी मागणी करण्यात आली होती.
मडकई पंचायतीची ग्रामसभा सरपंच शैलेंद्र पणजीकर यांच्या अध्यक्षतेखाली झाली. यावेळी पंचायत सदस्य तसेच पंचायत सचिव उपस्थित होते. ग्रामसभेच्या सुरवातीला पंचायत सचिवाने मागील ग्रामसभेचा अहवाल सादर केला. त्यानंतर अनेक विषयांवर चर्चा झाली.
राज्यात बेरोजगारीचा प्रश्‍न सतावत आहे. त्यातच मडकई, कुंडई आदी ठिकाणी औद्योगिक वसाहती असून त्यात मोठमोठे औद्योगिक प्रकल्प उभे राहिले आहेत. या औद्योगिक प्रकल्पात स्थानिकांना नोकऱ्या मिळाव्या, अशी सूचना राजेश नाईक तसेच इतरांनी केली.
पंचायतक्षेत्रात पाण्याची पातळी कमी होऊ लागल्याने औद्योगिक वसाहतीतील बांधलेल्या बोअरवेलची पाहणी करण्याची सूचनाही ग्रामस्थांनी केली. पाण्याची पातळी कमी होत असल्याने स्थानिकांना पाण्यासाठी वणवण करावी लागेल, असे ग्रामस्थांनी सांगितले, त्यामुळे हा निर्णय झाला.
पंचायतक्षेत्रातील घरांच्या घरपट्टीवर चर्चा झाली. गेला बराच काळ पंचायतक्षेत्रातील घरपट्टी तसेच व्यावसायिक आस्थापनांचा कर वाढवण्यात आलेला नाही, घरपट्टीसंबंधी एक सर्वेक्षण करण्यात आले आहे, मात्र स्थानिकांना विश्‍वासात घेऊनच त्यावर निर्णय होणार आहे. त्यामुळे यासंबंधी पुढील ग्रामसभेत विचारविनिमय करण्यात येणार आहे. अन्य विषयही ग्रामसभेत चर्चेला आले त्यावर सविस्तर चर्चा करण्यात आली. ग्रामस्थांच्या प्रश्‍नांना सरपंच शैलेंद्र पणजीकर, पंचायत सचिव व इतर पंचसदस्यांनी समर्पक उत्तरे दिली.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.