सडये शिवोलीत अवैधरित्या डोंगराची कापणी सुरुच

म्हापसा : अवैध डोंगर कापणी सुरु असल्याने सडये शिवोलीतील नागरिक आक्रमक झाले आहेत. डोंगरावर असलेल्या झाडांचंही यामुळे मोठं नुकसान होत असल्याने ग्रामस्थांनी आक्रमक पवित्रा घेत हे काम तातडीने थांबवण्याची मागणी केली आहे. मात्र अजूनही काम सुरुच असल्याने नागरिक संतप्त झाले आहेत.

सडये शिवोलीतील (Siolim) मायणावाडो परिसरात सर्व्हे क्रमांक 247 आणि 247/5 येथे मोठ्या प्रमाणात डोंगर कापणी सुरु आहे. या अवैध डोंगरकापणीला आता सडये शिवोलीतील ग्रामस्थांनी आक्षेप घेतला आहे. मागील 10 दिवसांपासून या डोंगरात खोदकाम सुरु असून यात आतापर्यंत शेकडो फळझाडं आणि इतर झाडांचही मोठं नुकसान झालं आहे.

आतापर्यंत या अवैध डोंगरकापणीप्रकरणी पंचायत, प्रशासन आणि उपजिल्हाधिकाऱ्यांकडे तक्रार दाखल कऱण्यात आली आहे. इतकंच नाही, तर वन खात्यालाही याची माहिती दिली आहे. मात्र कुणीही अजून कारवाईसाठी न आल्याचं ग्रामस्थांचं म्हणणं आहे. या डोंगर कापणीमुळे विविध प्राणी, पक्षी यांचा अधिवास नष्ट होण्याची भीती व्यक्त केली जात आहे. मात्र पंचायतीच्या (Panchayat) आशीर्वादानेच हा सारा अवैध डोंगरकापणीचा प्रकार होत असल्याचा आरोप ग्रामस्थांनी केला आहे.