Leopard In Bordem: बोर्डेत बछड्यासह दिसलेला बिबट्या तोच आहे की..? आधीच भीती त्यात संभ्रम

Leopard Sighting In Bordem Goa

डिचोली: साष्टीवाडा-बोर्डे येथे अपघातात जखमी झालेला ''तो'' बिबटा अद्याप पिंजऱ्यात अडकलेला नाही. त्यामुळे लोकांमध्ये पसरलेली भीती कायम असतानाच, परिसरात आज (मंगळवारी) दिवसाढवळ्या भर लोकवस्तीजवळ एका बछड्यासह बिबट्याचे दर्शन घडले.

बछड्यासह बिबट्या नजरेला पडल्याने स्थानिकांमध्ये भीतीने धडकी भरली आहे. आज सकाळी बछड्यासह बिबट्या संचार करताना काही स्थानिकांनी पाहिले आहे. बछड्यासह दर्शन दिलेला बिबट्या जखमी की अन्य ते मात्र स्पष्ट होऊ शकले नाही.

बछड्यासह बिबट्या भर लोकवस्तीजवळ असल्याची माहिती मिळताच आज दुपारी वन खात्याचे पथक साष्टीवाडा येथे दाखल झाले. त्यांनी परिसराची पाहणी केली. पुन्हा बिबट्या नजरेस पडल्यास लगेच संपर्क साधा. असे आवाहन त्यांनी परिसरातील लोकांना केले. बिबट्याचा ठावठिकाणा शोधून काढण्यासाठी कॅमेरे बसविण्याची तयारीही वन खात्याने ठेवली आहे.