Yuri Alemao : कुंकळ्ळी औद्योगीक वसाहतीत "ऑल इज नॉट व्हेल" : युरी आलेमाव

Yuri Alemao : कुंकळ्ळी औद्योगिक वसाहतीला लागून केलेल्या विहीरीचे गूढ बांधकाम कुंकळ्ळी औद्योगिक वसाहतीत "ऑल इज नॉट व्हेल’ असल्याचेच स्पष्ट करते. वायू आणि जल प्रदूषण, खाजगी मालमत्ता तसेच सरकारी जमिनींवर औद्योगिक आस्थापनांकडून बेकायदेशीर अतिक्रमण अशी अनेक प्रकरणांनी सदर औद्योगीक वसाहत ग्रासली आहे.

प्राणघातक प्रदूषण, बेकायदा अतीउत्पादन उत्पादन आणि जीएसटीची चोरी तसेच बेकायदेशीर अतिक्रमणांसह राज्याचे महसूल नुकसान थांबवण्यासाठी सरकारने त्वरित पावले उचलावीत अशी मागणी कुंकळ्ळीचे आमदार व विरोधी पक्षनेते युरी आलेमाव यांनी केली आहे.

"विहिरीच्या बेकायदेशीर बांधकामाशी संबंधित अज्ञात व्यक्तींना कुंकळ्ळी नगर पालीकेने बजावलेल्या कारणे दाखवा नोटीसवर प्रतिक्रिया देताना, युरी आलेमाव म्हणाले की सदर औद्योगीक वसाहतीतील सर्व बेकायदेशीर गोष्टी थांबविण्याची गरज आहे आणि कायद्याचे उल्लंघन करणार्‍यांवर कठोर कारवाई केली पाहिजे."

"मागील विधानसभेच्या अधिवेशनात कुंकळ्ळी औद्योगीक वसाहतीसंबंधी अनेक मुद्दे उपस्थित केले होते. यावेळी मुख्यमंत्र्यांनी खास पथक पाठवून कुंकळ्ळी औद्योगिक वसाहतीतील काही आस्थापनांकडून होणारे प्रदूषण, अतिउत्पादन, कर चुकवेगिरी याबाबत चौकशी करण्याचे आश्वासन दिले होते."

"अधिवेशनानंतर खरोखरच काही कारवाई झाली की नाही हे पाहण्यासाठी आता आगामी विधानसभा सत्रात तारांकीत प्रश्न मांडले आहेत," असे युरी आलेमाव म्हणाले.

"कुंकळ्ळी औद्योगीक वसाहत म्हणजे "टिकिंग बॉम्ब" असून कोणत्याही क्षणी त्याचा स्फोट होऊ शकतो. पिळर्ण औद्योगीक वसाहतीत लागलेल्या आगीपासून सरकारने धडा घेतला पाहिजे आणि अपघातांचे मुख्य कारण असलेल्या बेकायदेशीर गोष्टींवर नियंत्रण ठेवण्यासाठी सक्रिय पावले उचलली पाहिजेत," असे युरी आलेमाव म्हणाले.

मी कधीही कोणत्याही बेकायदेशीर गोष्टींचे समर्थन करणार नाही. माझे ठाम मत आहे की कुंकळ्ळी औद्योगिक वसाहतीतील सर्व प्रदूषणकारी कारखाने तात्काळ बंद करण्यात यावेत आणि पर्यावरणपूरक उद्योग आणले जावेत," असे युरी आलेमाव यांनी सांगितले.