Shacks Commercial : शॅक्स व्यावसायिकांनी लवकरच गाशा गुंडाळला; पर्यटक घटले

Shacks Commercial :

फातोर्डा, समुद्रकिनाऱ्यांवरील शॅक्सव्यावसायिकांनी पर्यटक नसल्याने कालावधी संपण्याच्या आधीच आपला गाशा गुंडाळण्यास सुरुवात केली आहे.

शॅक्स पॉलिसी उशिरा घोषित केल्याचा व चार्टर्ड विमाने नसल्याने अनेक शॅक्समालकांना यंदाच्या वर्षी प्रथमच मोठ्या प्रमाणात नुकसान सोसावे लागले आहे.

याबाबत माहिती देताना शॅक्समालक मिनिनो फर्नांडिस यांनी सांगितले की, पर्यटक नसल्याने मी शॅक्स काढून टाकला आहे. माझ्‍या शॅक्समध्ये मोठ्या प्रमाणात विदेशी पर्यटकांची रेलचेल असायची आणि हे पर्यटक ऑक्टोबर, नोव्हेंबर महिन्यात दाखल होत असत.

पर्यटक खात्याने उशिरा शॅक्स वितरण जाहीर केल्याने आणि गोव्यात दाखल होणारी चार्टर्ड विमाने इतर देशांत वळल्याने मोठ्या प्रमाणात नुकसान सोसावे लागले आहे. मला तर तब्‍बल १० लाख रुपयांचा फटका बसला.

उत्तर गोव्यातील कांदोळी येथील स्पोटी शॅक्सचे मालक व्‍हिक्‍टर परेरा म्हणाले, पर्यटक नसल्याने येत्या काही दिवसांत मी शॅक्स बंद करणार आहे. अनेकांनी आपले शॅक्स बंद केले आहेत. याचे मुख्य कारण म्हणजे शॅक्स धोरणाची उशिरा झालेली अंमलबजावणी. याबरोबरच विमान सेवेचे वाढलेले दर.

यामुळे पर्यटक स्वस्त सेवेच्या देशांकडे वळले आहेत. गोव्यात पर्यटन व्यवसायाला चालना देण्यासाठी चांगल्या दर्जाच्या पर्यटकांना बोलवायला हवे. सध्या पर्यटक नसल्याने स्वतःच्या खिशातील पैसे खर्च करून कामगारांना पगार देण्याची वेळ आली आहे.

पर्यटक खात्याने शॅक्स खाली करण्यासाठी ३१ मे हा दिवस निश्चित केला असला तरी त्यापूर्वी पर्यटक नसल्याने आम्हाला शॅक्स खाली करावे लागत आहेत. येणारे देशी पर्यटक खाण्यापिण्‍याचे सामान व दारू आपल्यासोबत घेऊन येतात. त्यामुळे आम्हाला ग्राहक मिळत नाहीत.

- सॅम, ‘सॅम पॅरेडाईज’चे मालक

देशी पर्यटक गोव्यात मौजमस्ती करण्यासाठी येतात. रात्री उशिरापर्यंत चालणारी किनारी भागातील संगीत रजनी त्यांचे खास आकर्षण असते. मात्र त्‍यावर सरकारने रात्री १० वाजेपर्यंत मर्यादा घातल्याचा परिणाम पर्यटन व्यवसायावर झाला आहे. विदेशी पर्यटकही कमी झाले आहेत.

- एन. मार्टिन, शॅकमालक (वार्का)