'कोकणी भाषा ही गोवेकरांची ओळख'

कुडचडे: राजभाषेचा प्रशासनात सर्रासपणे उपयोग व्हायला हवा. कोकणी ही गोवेकरांची निर्विवाद ओळख असल्याचे मत गोवा काँग्रेसचे प्रदेशाध्यक्ष अमित पाटकर यांनी व्यक्त केले. सावर्डे कुडचडे येथील शणै गोंयबाब सेवा केंद्र आयोजित कौतुक सोहळ्यात प्रमुख पाहुणे म्हणून ते बोलत होते. अध्यक्षस्थानी कला आणि संस्कृती खात्याचे माजी संचालक एम. व्ही. नाईक होते. यावेळी कोकणीतील साहित्य अकादमीचे पारितोषिक विजेते संजीव वेरेकर, मंगळुरूच्या विमला पै फाउंडेशनचे पुरस्कार विजेते उदय म्हांबरे यांचा सत्कार करण्यात आला.

कोकणी गोवेकराचा श्वास आहे. गोव्यातील विलीनीकरण वाद, कोकणीची साहित्य अकादमी मान्यता, घटकराज्य, राजभाषेची चळवळ यांच्या अभ्यासाअंती बोलत असल्याचे पाटकर यांनी सांगितले. नाईक यांनी गोव्यातील कला आणि संस्कृतीचा आढावा घेतला. परराज्यात कोकणी हीच गोवेकराची एकमेव ओळख असल्याचे ते म्हणाले. केंद्राचे अध्यक्ष मनोहर पांगो नाईक यांनी प्रास्ताविक, विठ्ठल सावंत आवदियेकर यांनी सूत्रनिवेदन केले आणि सचिव मोहनदास सावंत देसाई यांनी आभार मानले.