कोकण रेल्वे पोलिसांनी मोबाईल चोरट्यांच्या मुसक्या आवळल्या

फातोर्डा : कोकण रेल्वे मार्गावर गेल्या काही दिवसांमध्ये चोरीच्या घटनांमध्ये कमालीची वाढ झाल्याचं चित्र आहे. आता कोकण रेल्वे पोलिसांनी दोन मोबाईल चोरट्याना अटक केली आहे. चोरट्यांकडून चोरलेले मोबाईल फोन आणि इतर काही मोबाईल पोलिसांनी हस्तगत केले आहेत.

(Konkan Railway Police caught mobile thieves)

दिनेश कुमार (27 रा. रुधौली बस्ती उत्तरप्रदेश) आणि सद्दाम शेख (25 रा. सोलापूर महाराष्ट्र) या दोन आरोपींना कोकण रेल्वे पोलिसांनी अटक केली आहे. तपासादरम्यान त्यांच्याकडील 15 हजार रुपयांचा सॅमसंग मोबाईल तसेच आणखी दोन फोन हस्तगत करण्यात आले आहेत. या सर्व फोनची एकंदरीत किंमत अंदाजे पन्नास हजार रुपये आहे. याप्रकरणी कुमार रामण्णा यांनी तक्रार दाखल केली होती.

दरम्यान मागच्याच आठवड्यात रेल्वेमधून प्रवास करत असताना एका महिलेची लूट करण्यात आल्याचा प्रकार उघडकीस आला होता. सोन्याचे दागिने आणि रोख रक्कम असे मिळून एकंदरीत 5.20 लाख ऐवज असलेले बॅग लंपास करण्यात आली होती. एका संशयिताला याप्रकरणी बेड्याही ठोकण्यात आल्या होत्या.

संबंधित महिला कोईम्बतूर एक्स्प्रेस मधून प्रवास करत होती. दुपारच्या वेळी 3.30 वाजता सोन्याच्या रिंग, सोनसाखळी, रोख रकमेसहित इतर मौल्यवान वस्तू असलेली तिची बॅग चोरण्यात आल्याची असल्याची माहिती पोलीस तक्रारीत नमूद करण्यात आली आहे . या वस्तूंची एकंदरीत किंमत अंदाजे 5.20 लाख रुपये अशी असून एका अज्ञात व्यक्तीने या वस्तूंची चोरी केली असल्याचे तिने तक्रारीत नमूद केले होते.