Kokan Railway Net Profit New Projects
सासष्टी: कोकण रेल्वे कॉर्पोरेशन लिमिटेडने स्थापनेपासुनचा सर्वाधिक निव्वळ नफा २०२३-२४ या आर्थिक वर्षांत केला. २०२३-२४ साली कॉर्पोरेशनला ४७०० कोटी रुपयांची उलाढाल झाली व ३०१ कोटींचा निव्वळ नफा प्राप्त झाल्याची माहिती कोकण रेल्वेच्या ३४ व्या स्थापना दिनाच्या सोहळ्यात देण्यात आली.
हा सोहळा मडगावच्या रवींद्र भवनात साजरा करण्यात आला. या सोहळ्यात १५० हून अधिक कर्मचाऱ्यांचा गौरव करण्यात आला. या सोहळ्याला चेअरमन व मुख्य कार्यकारी अधिकारी संतोष कुमार झा, संचालक राजेश भडंग, आर. के. हेगडे हे मान्यवर उपस्थित होते.
संतोष झा यांनी सांगितले की पेडणे व ओल्ड गोवा येथील बोगद्यासाठी केंद्र सरकारने १५०० कोटी रुपये मंजूर केले असून हे काम लवकरच सुरु होईल. त्यामुळे अनेक समस्या सुटू शकतील. त्यांनी कर्मचाऱ्यांसाठी अनेक घोषणा केल्या त्यात त्यांनी प्रत्येक कर्मचाऱ्याला १७९५१ रुपयांचा सानुग्रह जाहीर केला आहे.
दरम्यान, संचालक राजेश भडंग यांनी कोकण रेल्वेचा आर्थिक अहवाल सादर केला. कर्मचाऱ्यांसाठी ज्या योजना सुरु करण्यात आल्या आहेत त्याची त्यांनी माहिती दिली. कोकण रेल्वे कॉर्पोरेशनने कर्मचाऱ्यांसाठी हिंदी कविता स्पर्धा आयोजित करण्यात आली होती. त्यातील निवडलेल्या १०० कविता संग्रहाचे प्रकाशन करण्यात आले.
सहा महिन्यांत कॉर्पोरेशनला १७०० कोटी रुपयांचे प्रकल्प मिळाले. शिवाय कॉर्पेरेशनला दर्जा व्यवस्थापन सिस्टम, आरोग्य व सुरक्षा व्यवस्थापन, पर्यावरणीय व्यवस्थापन, माहितीसाठी आयएसओ प्रमाणपत्र प्राप्त झाले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.