Konkan Railway : कोकण रेल्वेच्या ‘रेंट अ बाईक’ची निविदा रद्द करा; कळंगुट येथे स्थानिक व्यावसायिक एकवटले

Konkan Railway :

म्हापसा कोकण रेल्वेने विविध रेल्वे स्थानकांवर ‘रेंट-अ -बाईक’ व ‘ईव्ही’ कार सेवा सुरू करण्याची जी योजना आखून जाहिरात काढली आहे, त्यास विरोध करताना आज शनिवारी कळंगुट येथे मोठ्या संख्येने स्थानिक रेंट अ बाईक आणि टॅक्सीचा व्यवसाय करणाऱ्यांनी एकत्रित येत ही निविदा प्रक्रिया रद्द करण्याची मागणी केली.

यासंदर्भात स्थानिक व्यावसायिक हे सोमवारी (ता.३) मुख्यमंत्र्यांची भेट घेऊन निवेदन सादर करणार आहेत.

सरकारने या व्यवसायात असलेल्या स्थानिकांना पाठिंबा द्यायला हवाय. कोकण रेल्वे आता या व्यवसायात उतरू पाहत असल्याने आम्हाला नुकसानीची भीती आहे, कारण ही सेवा अस्तित्वात आल्यास स्थानिकांच्या रोजगारावर गडांतर येईल, अशी भीती स्थानिक व्यावसायिकांनी बोलून दाखवली.

कोकण रेल्वे महामंडळाच्या बाईक आणि कार भाड्याने देण्याच्या व्यवसायात प्रवेश करण्याच्या निर्णयाला विरोध केला आहे.

काही दिवसांपूर्वी कोकण रेल्वेने कारवार, काणकोण, मडगाव, करमळी आणि थिवी येथे रेंट-अ-बाईक सेवा सुरू करण्याच्या दृष्टीने ऑपरेटर मिळविण्याकरिता निविदा जारी केली होती. यावेळी बोलताना रस्किन मस्करेन्हास म्हणाले की, कोकण रेल्वे महामंडळाच्या बाईक आणि कार भाड्याने देण्याच्या व्यवसायात प्रवेश करण्याच्या निर्णयाला आमचा सक्त विरोध आहे. यामुळे स्थानिक व्यावसायिकांच्या उदरनिर्वाह धोक्यात येईल.

व्यावसायिकांच्या मनात भीती

सुदीप ताम्हणकर म्हणाले की, इलेक्ट्रिक वाहनांच्या (ईव्ही) वापराला चालना देण्यासाठी केंद्र सरकारने इलेक्ट्रॉनिक वाहनांना परमिटच्या अटींमधून सूट दिली आहे. तसे परिपत्रक केंद्रीय वाहतूक खात्याने काढले आहे. या पार्श्वभूमीवर एखादी कॉर्पोरेट कंपनी गोव्यात ईव्ही बसेस किंवा रेंट वाहनांचा व्यवसाय सुरू करू शकते.

ही भीती स्थानिक व्यावसायिकांना भेडसावत आहे. त्यामुळे सरकारने हे परिपत्रक रद्द करावे अशी आमची मागणी आहे. त्यामुळे सरकारने आमच्यावर ओढवलेले संकट दूर करावे आणि मुख्यमंत्र्यांनी यात लक्ष घालावे अशी विनंती त्यांनी केली.