अल्पवयीन मुलाला डांबून जीवे मारण्याची धमकी; मुलाच्या आईकडे सात लाखांच्या खंडणीची मागणी

कोलवा: अल्पवयीन मुलाला डांबून जीवे मारण्याची धमकी दिली. त्यानंतर मुलाचे अपहरण करुन सात लाखांच्या खंडणीची मागणी केली. याप्रकरणी कोलवा पोलिसांनी संशयित मार्कोस मेनिनो डिसोझा (रा. बेताळभाटी) याला अटक केलीय. त्याच्याकडून बुलेटससह दोन बंदुका जप्त करण्यात आलेल्या आहेत.

याप्रकरणी जुलिका फर्नांडिस ई टेलेस यांनी कोलवा पोलिसांत तक्रार दाखल केली. त्यानुसार पोलिसांनी अपहरण आणि खंडणीचा गुन्हा दाखल केला.

मिळालेल्या माहितीनुसार, संशयित मार्कोस यांने तक्रारदार जुलिका यांच्या अल्पवयीन मुलाला डांबून ठेवले व जीवे मारण्याची धमकी दिली. मार्कोसने त्यानंतर मुलाचे अपहरण करुन सात लाखांच्या खंडणीची मागणी केली. पैसे देण्यासाठी गेलेल्या तक्रारदार महिलेचा देखील संशयिताने विनयभंग केल्याचे तक्रारीत म्हटले आहे.

पोलिसांनी मार्कोसला ताब्यात घेतले व त्याच्याकडून दोन बंदुकांसह बंदुकीच्या गोळ्याही जप्त केल्या. क्रिप्टो चलन व मायनिग मशीन यातून हा प्रकार घडल्याचे पोलिसांच्या प्राथमिक तपासातून समोर आले आहे.