Nevra Grande: नेवरा येथे खाजन शेतीत पुन्हा पाणी! नाराज शेतकऱ्यांची प्रशासनावर जोरदार टीका

Nevra Grande Khazan Land River Water Flood ISsue

तिसवाडी: नेवरा ओ ग्रांद येथील खाजन शेती जमिनीत पुन्हा एकदा नदीचे पाणी शिरल्याने शेतकऱ्यांमध्ये प्रचंड नाराजी आहे. हा प्रकार वारंवार घडत असल्याने प्रशासनाच्या कारभारावर टीका करण्यात येत आहे. हा प्रकार असाच सुरू राहिल्यास खाजन शेती जमीन कधीच पूर्ववत होणार नसल्याचे शेतकऱ्यांचे म्हणणे आहे.

यापूर्वी याच खाजनातील शेतीत अशाच प्रकारे नदीचे पाणी घेऊन बुडवण्यात आली होती. तेव्हा वृत्तपत्रांनी यावर प्रकाश टाकल्यानंतर तिसवाडी मामलेदारांनी कारवाई करत दोन मानस ठेकेदारांना नोटीस बजावली होती. परंतु हा प्रकार नित्याचा झाल्याने प्रशासनाची धास्ती नसल्याची दिसते. पाणी शिरून शेती नष्ट झाल्याने शेतकऱ्यांनी तीव्र नाराजी व्यक्त केली.

काही दिवसांपूर्वी सांतआंद्रेतील समाज माध्यमांवर व्हिडिओ व्हायरल झाला होता, त्यात शेतकरी संघटनेचे सदस्यांनी आमदार विरेश बोरकर यांना शेतकऱ्यांना भेटण्यासाठी वेळ नसल्याची टीका केली होती, तसेच नेवरा ओ ग्रांद खाजनातील शेती जमिनीत शिरलेले नदीचे पाणी देखील त्यांनी दाखवले होते. खासकरून तिसवाडी मामलेदार कार्यालयावर टीकास्त्र सोडले होते.

खाजन शेतीचा विषय सांतआंद्रेत पुन्हा ऐरणीवर आल्याने प्रशासनाला यावर तोडगा काढणे शक्य नाही की याकडे जाणून बुजून दुर्लक्ष केले जात नाही, अशी शंका शेतकऱ्यांच्या मनात निर्माण झाली आहे. सरकारकडून विविध आश्वासने दिली जात असली तरी ती केवळ तोंडी राहिल्याची टीका शेतकरी करत आहेत.