Goa Crime: कारापूर येथे गाडी अडवली, जीवे मारण्याची धमकी देत मागितली 10 लाखांची खंडणी; डिचोलीतील 2 तरुणांना अटक

डिचोली: जीवे मारण्याची धमकी देऊन तब्बल दहा लाख रुपयांची खंडणी मागितल्याच्या आरोपावरून दोन युवकांना डिचोली पोलिसांनी अटक केली. या प्रकरणात संशयितांनी वापरलेली वाहनेही पोलिसांनी ताब्यात घेतली आहेत.

सलमान खान (वय २६ वर्षे, रा. खोर्ली-जुने गोवे) आणि मकसूद खान (वय २९ वर्षे, भोम-फोंडा) अशी संशयितांची नावे आहेत. धमकी आणि खंडणी मागण्याची ही घटना ८ जून रोजी रात्री डिचोली-साखळी मुख्य रस्त्यावरील कुळण-कारापूर येथे घडली होती.

यासंबंधीची माहिती अशी की, केरी-सत्तरी येथील मुआज शेख हा युवक साखळीहून मोपा येथे जाताना ही घटना घडली होती. कारापूर येथे मागून येणाऱ्या युवकांनी मुआज शेख यांची गाडी अडवून दहा लाख रुपयांची खंडणी मागितली.

मात्र, पोलिस येत असल्याची कुणकुण लागताच संशयितांनी घटनास्थळावरून पलायन केले होते. याप्रकरणी डिचोली पोलिसांनी गुन्हा नोंद करून पोलिस निरीक्षक विजय राणे यांच्या मार्गदर्शनाखाली तपास सुरू केला होता. संशयितांना अटक केल्याने या प्रकरणामागील सत्य आता समोर येण्याची शक्यता आहे.