सासष्टी : काणकोण तालुक्यातील करमल घाट ते मनोहर पर्रीकर बगलरस्त्यापर्यंतचा राष्ट्रीय महामार्ग 66चा भाग अपघातग्रस्त असल्याने त्याची दुरुस्ती व विस्तारीकरण करण्याची किंवा डोंगर कापून बोगद्यातून दुसरा रस्ता निर्माण करण्याची मागणी काणकोणवासीयांकडून होत आहे. या विषयावर बोलताना सर्व संबंधितांकडे सविस्तर चर्चा झाली व 30 जूनपर्यंत निर्णय घेतला जाईल, असे सार्वजनिक बांधकाममंत्री नीलेश काब्राल यांनी सांगितले.
यासंबंधी चर्चा करण्यासाठी काब्राल तसेच काणकोणचे आमदार व सभापती रमेश तवडकर यांनी संबंधितांची बैठक मडगावच्या जिल्हाधिकारी कार्यालयात घेतली. बैठकीनंतर ते पत्रकारांशी बोलत होते. विद्यमान रस्ता दुरुस्ती व रुंदीकरण केल्यास जवळजवळ 13,471 झाडे कापली जातील, असे सल्लागाराने अहवालात नमूद केले आहे. त्यामुळे काही पर्यावरणवादी नागरिकांचा त्यास विरोध आहे. पण प्रत्यक्षात तशी परिस्थिती नाही, असे आपण त्यांना सांगितल्याचे काब्राल म्हणाले.
हा रस्ता 3.9 किलोमीटरचा आहे व बोगदा जवळजवळ 1.5 कि. मी. अंतराचा आहे. त्यामुळे बोगद्याच्या दोन्ही बाजूला 750-750मीटर लांबी व 45 मीटर रुंदी असल्याने त्या परिसरातील झाडेही कापणे अपरिहार्य असणार आहे. शिवाय बोगदा रस्त्याला 600 कोटी रुपये तर सध्याच्या रस्ता दुरुस्तीला केवळ 100 कोटीच्या खर्चाचा अंदाज आहे, असे काब्राल म्हणाले. सभापती तवडकर यांनी महामार्ग दुरुस्तीची दखल घेतल्याबद्दल काब्राल यांचे आभार मानले.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
