पणजी: नूतनीकरण केलेल्‍या कला अकादमीच्‍या नाट्यगृहातील कामांसह कोसळलेले खुले सभागृह पुन्हा उभारण्‍यासाठी आयआयटी मुंबईची सल्लागार म्‍हणून नेमणूक करण्‍यात आली आहे. पुढील काही दिवसांत मुंबई आयआयटी या कामांची पाहणी करून आपला अहवाल सादर करेल.
त्‍यानंतर नाट्यगृहातील दुरुस्‍त्‍यांसह खुले सभागृह नव्‍याने उभारण्‍याची प्रक्रिया सुरू करण्‍यात येईल, अशी माहिती सार्वजनिक बांधकाम खात्‍याचे मुख्‍य अभियंते सुभाष बेळगावकर यांनी शनिवारी ‘गोमन्तक’शी बोलताना दिली.
कला अकादमीच्‍या नूतनीकरणानंतरही कंत्राटदार टेकटॉन कंपनीने नाट्यगृहाच्‍या कामात त्रुटी ठेवल्‍या. त्‍याचा मोठा फटका काही नाटकांना सहन करावा लागल्‍याचे समोर आल्‍यानंतर या कामांतील त्रुटी शोधण्‍यासाठी राज्‍य सरकारने कृतिदलाची स्‍थापना केली.
कृतिदलाच्‍या सदस्‍यांनी कामांचा आढावा घेऊन नाट्यगृहातील ध्वनी, प्रकाश योजना आणि रंगमंचासंदर्भात तीन सल्लागारांची नेमणूक करण्याच्या सूचना ‘पीडब्ल्यूडी’ला केल्या होत्या. त्यानुसार ‘पीडब्ल्यूडी’ने ध्वनीसाठी रॉजर ड्रेगो, प्रकाश योजनेसाठी शीतल तळपदे आणि रंगमंचासाठी राजन भिसे यांची नेमणूक केली होती.
या तीन सल्लागारांनी नाट्यगृहाची पाहणी करून काही महिन्‍यांपूर्वी शिफारशींचा अहवाल सरकारला सादर केलेला आहे. त्‍यानंतर आता सरकारने नाट्यगृहातील त्रुटी दूर करण्‍यासह कोसळलेले खुले सभागृह पुन्हा उभे करण्‍याची प्रक्रिया सुरू केली आहे. यासाठी आयआयटी मुंबईची निवड करण्‍यात आली आहे, असे बेळगावकर यांनी सांगितले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
