Kadamba Bus: साखळी ते पणजी धावणारी 'कदंब' गायब? कारापूर-सर्वणमधील विद्यार्थी अडकले, बेभरवशाच्या सेवेमुळे अनेकांना फटका

Karapur Sarvona Kadamba Bus

डिचोली: डिचोली तालुक्यातील ग्रामीण भागातील प्रवासी बससेवा कोलमडली असून, ''कदंब''ची प्रवासी बससेवा तर बेभरवशाची बनली आहे. कारापूर-सर्वणमार्गे साखळी ते पणजी मार्गावर वाहतूक करणारी ''कदंब''ची प्रवासी बसगाडी गेल्या दोन दिवसांपासून गायब झाली आहे.

काल (बुधवारी) आणि आज (गुरुवारी) ही बसगाडी नियोजित मार्गावर धावलीच नाही. त्यामुळे नियमित प्रवाशांची प्रचंड गैरसोय होताना विद्यार्थीही अडकून पडले. ही प्रवासी बसगाडी अचानक गायब होण्यामागचे कारण स्पष्ट झालेले नाही.

साखळीहून सकाळी ७.३० वा. सुटणारी कदंबची बसगाडी कारापूर-सर्वणमार्गे डिचोलीहून पणजी मार्गावर वाहतूक करते. ''कदंब''ची ही प्रवासी बसगाडी कारापूर आणि सर्वण या ग्रामीण भागातील प्रवाशांना विशेष करुन कामगार आणि विद्यार्थ्यांना सोयीस्कर आहे. मात्र गेल्या दोन दिवसांपासून ही बसगाडी गायब आहे.

कारापूर-सर्वणहून डिचोली आदी शहराच्या ठिकाणी शिक्षणासाठी जाणाऱ्या विद्यार्थ्यांची मोठी गैरसोय होताना ते दोन दिवस अडकून पडले. विद्यार्थ्यांना पायपीट करुन शाळा गाठावी लागली. शाळेत वेळेवर पोचणे विद्यार्थ्यांना शक्य झाले नाही. कदंब वाहतूक महामंडळाने गैरसोय लक्षात घेवून कारापूर-सर्वणमार्गे धावणारी प्रवासी बसगाडी नियमित करावी. अशी मागणी विद्यार्थ्यांकडून होत आहे.