‘कदंब’ची बस ब्रेकडाऊन, सतर्क बसचालकामुळे टळला धोका; विद्यार्थ्यांसह, प्रवाशांची गैरसोय

Kadamba bus breakdown Bicholim Route Mayem students trapped

डिचोली: डिचोली-पैरा मार्गावर वाहतूक करणारी कदंबची प्रवासी बस आज (मंगळवारी) मये येथे वाटेतच अडकून पडली. केळबायवाडा येथील उतरणीवर ‘ब्रेक’मध्ये बिघाड निर्माण झाल्याने बस अडकून पडल्याचे समजते. बसचालकाने धोका ओळखून वेळीच बस थांबवल्याने कोणतीही विपरीत घटना घडली नाही. द’रम्यान, दुपारच्यावेळी बस बंद पडल्याने विद्यार्थी मात्र अडकून पडले.

सायंकाळपर्यंत ही बसगाडी रस्त्यावरच बंदावस्थेत उभी होती. कदंबची जीए-०३-एक्स-०४४० ही प्रवासी बस आज दुपारी डिचोलीहून पैराला जात होती. केळबायवाडा येथील उतरणीवर पोचताच बस नादुरुस्त झाली. या बसमध्ये अन्य प्रवाशांसमवेत विद्यार्थी होते. बस नादुरुस्त झाल्याने त्यांची गैरसोय झाली.

गैरव्यवस्थापन म्हणा किंवा अनागोंदी कारभार म्हणा. कदंब वाहतूक महामंडळाची प्रवासी बससेवा अधूनमधून बेभरवशाची बनत चालली आहे. ग्रामीण भागातील मार्गावर तर हा प्रकार सवयीचाच झाला आहे. ‘कदंब’ची प्रवासी बससेवा प्रवाशांचा कधी घात करेल, त्याचा नेम नाही, असे प्रवाशांना अनुभव येत असतो.