Kadamba Bus Transport: वाळपईत लवकरच कंदबाची इलेक्ट्रीक बससेवा सुरू करणार; व्यवस्थापकीय संचालक संजय घाटे यांची माहिती

Kadamba Bus Transport in Valpoi

माजी मुख्यमंत्री प्रतापसिंह राणे यांच्यामुळे सत्तरीतील गावागावात कदंबा सेवा सुरु करण्यात आली होती. या सेवेमुळे 80 टक्के शालेय आणि महाविद्यालयीन विद्यार्थ्यांना याचा लाभ होत आहे.

ग्रामीण भागात कंदबामुळे वाहतुकीची चांगल्या प्रकारे सोय होत असून येणाऱ्या दिवसात जास्तीत जास्त कदंबा, खास करुन इलेक्ट्रीक बस वाहतूक सुरु करण्यात येणार आहे. विद्यार्थ्यांचा विचार करुन त्यांना कदंब पास देण्याची सोय करण्यात येणार आहे.

यासाठी वाळपई कंदबा बसस्थानकावर पास सेवा येणाऱ्या दिवसात सुरु केली जाणार असल्याचे प्रतिपादन कदंब महामंडळाचे व्यवस्थापकीय संचालक संजय घाटे यांनी वेळुस वाळपई येथील श्री हनुमान विद्यालयातील मुलांना जारी केलेल्या कदंब बस पासच्या वितरण कार्यक्रमात बोलताना केले.

यावेळी व्यासपीठावर वाळपई शिक्षण संस्थेचे अध्यक्ष नरहरी हळदणकर, मुख्याध्यापिका सुविधा बर्वे, व्यवस्थापक देवेश पेडणेकर, सचिव सदाशिव वेलिंगकर, साधना जोशी आदींची उपस्थिती होती. यावेळी ग्रामीण भागातील एकूण चाळीस मुलांना पहिल्या टप्प्यातील 40 पास वितरण करण्यात आले.