ISL Football: बदली खेळाडू व्हिक्टर रॉड्रिगेझ याने आठ मिनिटे बाकी असताना नोंदवलेल्या निर्णायक गोलच्या बळावर एफसी गोवाने इंडियन सुपर लीग (आयएसएल) फुटबॉल स्पर्धेच्या दहाव्या मोसमातील अपराजित मालिका कायम राखली. फातोर्डा येथील पंडित जवाहरलाल नेहरू स्टेडियमवर त्यांनी सोमवारी जमशेदपूर एफसीला १-० फरकाने हरविले.
सामन्याच्या ८२व्या मिनिटास उदांता सिंगच्या शानदार असिस्टवर स्पॅनिश व्हिक्टर रॉड्रिगेझचे हेडिंग अचूक ठरले. त्यानंतर ८५व्या मिनिटास सेईमिन्लेन डौंगेल याने जमशेदपूरसाठी बरोबरीचा गोल केला होता, परंतु ‘व्हीएआर’ने हा गोल अमान्य केल्यामुळे एफसी गोवाची आघाडी अबाधित राहिली.
एफसी गोवाचे आता सहा लढतीनंतर पाच विजय व एका बरोबरीमुळे १६ गुण झाले आहेत. केरळा ब्लास्टर्सचेही तेवढेच गुण आहेत. मात्र मानोलो मार्केझ यांच्या मार्गदर्शनाखालील संघाची गोलसरासरी +७ अशी सरस असल्याने ते अव्वल स्थानी आले, तर +४ गोलसरासरीसह केरळचा संघ दुसऱ्या स्थानी राहिला.
जमशेदपूरला चौथा पराभव पत्करावा लागला. त्यामुळे सात लढतीनंतर त्यांचे पाच गुण व दहावा क्रमांक कायम राहिला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.