ISL 2024-25: दुसऱ्या क्रमांकासाठी महत्वाचा सामना, FC Goa भिडणार धोकादायक जमशेदपूरला

पणजी: इंडियन सुपर लीग (आयएसएल) फुटबॉल स्पर्धेत ‘शिल्ड’ पटकावण्याच्या शर्यतीत मोहन बागानने दहा गुणांची मजबूत आघाडी घेतली आहे. एफसी गोवाचाही दावा असून जमशेदपूर एफसीही गुणतक्त्यात प्रगती साधण्यास इच्छुक आहे. या अनुषंगाने रविवारी (ता. २) होणारा सामना दुसऱ्या क्रमांकासाठी महत्त्वाचा ठरेल.

जमशेदपूर एफसी व एफसी गोवा यांच्यातील सामना रविवारी जमशेदपूर येथील जेआरडी टाटा क्रीडा संकुलात खेळला जाईल. सध्या एफसी गोवाचे ३३, तर जमशेदपूरचे ३१ गुण आहेत. शनिवारी कोलकता येथे मोहम्मेडन स्पोर्टिंगला ४-० फरकाने नमविल्यामुळे अग्रस्थानावरील मोहन बागानच्या खाती ४३ गुण जमा झाले आहेत.

घरच्या मैदानावर खलिद जमिल यांच्या मार्गदर्शनाखालील जमशेदपूर एफसी धोकादायक ठरतो, जमशेदपूरमध्ये खेळलेल्या सलग पाच सामन्यांत त्यांनी चार विजय व एक बरोबरी नोंदविली आहे. ओळीने बारा सामने अपराजित असलेल्या मानोलो मार्केझ यांच्या मार्गदर्शनाखालील एफसी गोवास सावध राहावे लागेल. गोव्यातील संघ सध्या उत्कृष्ट फॉर्ममध्ये असून यंदा स्पर्धेतील अवे मैदानावर त्यांनी पराभव पत्करलेला नाही.

जमशेदपूरने मागील लढतीत नवी दिल्ली येथे पंजाब एफसीला हरविले होते, मात्र त्यापूर्वी त्यांना तळाच्या हैदराबादने पराभूत केले होते ही बाब नजरेआड करता येणार नाही. १७ लढतीत जमशेदपूरने १० विजय व एक बरोबरी नोंदविली असून सहा पराभव पत्करले आहेत. एफसी गोवाने नऊ विजय, सहा बरोबरी व दोन पराभव अशी कामगिरी केली आहे.

मैदानात उतरण्यापूर्वी...

पहिल्या टप्प्यात १७ सप्टेंबर २०२४ रोजी फातोर्डा येथे जमशेदपूर एफसीची एफसी गोवावर २-१ फरकाने मात

उभय संघांत १५ सामने, त्यात एफसी गोवाचे ८, जमशेदपूर एफसीचे ५ विजय, २ बरोबरी

एफसी गोवा १२ सामने अपराजित (८ विजय, ४ बरोबरी)

अवे मैदानावर सलग ८ सामने अपराजित (४ विजय, ४ बरोबरी)

एफसी गोवाचे यंदा स्पर्धेतील सर्व १७ सामन्यांत गोल (एकूण ३२)