Bastoda Panchayat: बस्तोडा पंचायतीकडून स्टॉल, गाळ्यांची पाहणी

Bastoda Panchayat: बस्तोडा पंचायतीने नुकताच बस्तोडा जंक्शनवरील कथित अवैध स्टॉल्स व गाडेधारकांची पाहणी करीत, या अतिक्रमणाबाबतची वैध कागदपत्रांची तपासणी केली. बस्तोडा पंचायतीने येथील जंक्शनवरील मुख्य रस्त्यालगत उभारलेल्या सर्व गाळे व स्टॉल्सना कारणे दाखवा नोटीस बजावली होती.

गोवा पंचायत राज कायदा १९९४च्या कलम ८२अन्वये जंक्शनवर कार्यरत असलेल्या सर्व गाडे व स्टॉल्स मालकांना पाहणीसंदर्भात नोटीस जारी केली होती. त्यानुसार, गुरुवारी बस्तोडा सरपंच सुभाष मोरजकर यांच्यासह उपसरपंच सुनीता लोटलीकर, पंचायत सचिव स्मिता शेट्ये परब व पंचायत कर्मचाऱ्यांनी जंक्शनवरील सर्व बांधकामांच्या जागेची पाहणी केली.

तसेच, त्यांच्याकडे उपलब्ध कागदपत्रांची पडताळणी केली. याशिवाय संबंधितांकडून अतिक्रमण झाले आहे की नाही, हे पाहण्यासाठी त्यांनी स्टॉल्स व गाळ्यांच्या प्रत्यक्ष मोजमापही केले. अशा सुमारे 16 बांधकामांची पंचायत मंडळाने पाहणी केल्याची माहिती सूत्रांनी दिली.

यातील बहुतांश गाळे व स्टॉल्स तात्पुरत्या एनओसीसह कार्यरत असल्याचे आढळले व त्यांना इतर प्राधिकरणांकडून आवश्यक एनओसी मिळालेली नाही. बस्तोडा सरपंच सुभाष मोरजकर म्हणाले, जंक्शनवरील सर्व बांधकामांना तपासणीसाठी नोटीस बजावली होती व त्यानुसार आम्ही गोवा पंचायत अधिनियम 1994 नुसार तपासणी व आवश्यक कार्यवाही केली.