'साळ नदीला पूर येऊ नये यासाठी नाला सफाईचे काम प्राधान्याने'

मडगाव : पावसात साळ नदीला पूर येऊन मडगाव आणि बाणावली भागातील घरात पाणी शिरण्याची शक्यता असल्याने नदीला जोडणाऱ्या सर्व नाल्यांची सफाई प्राधान्यक्रमाने हाती घेण्याचे निर्देश देण्यात आले आहेत. याबरोबरच साळ नदीच्या खाडीत जी मोठ्या प्रमाणावर पाण वनस्पती वाढली आहे ती पावसापूर्वी छाटून टाकण्याच्या सूचना आज पाटबंधारे खात्यांच्या अभियंत्यांना देण्यात आल्या आहेत.

मडगावचे आमदार दिगंबर कामत आणि बाणावलीचे आमदार व्हेंझी व्हिएगस यांनी पाटबंधारे विभागाच्या अभियंत्याबरोबर संयुक्त पाहणी केली. त्यावेळी साळ नदीला जोडणाऱ्या कित्येक नाल्यांची अजून सफाई हातीच घेतली नसल्याचे दिसून आले. तर काही ठिकाणी नाल्यात मातीचे भराव घातलेले दिसून आले.

हे नाले साफ केले नाहीत तर पावसाळ्यात येथे पाणी फुगून नदीच्या काठावर जी घरे आहेत ती पुराखाली येऊ शकतात हे कामत यांनी या अभियंत्यांच्या नजरेस आणून दिले. त्यामुळे पावसापूर्वी हे सर्व नाले साफ करण्याबरोबरच ज्या ठिकाणी मातीचे भराव आहेत ते काढून टाकणे आणि ज्या ठिकाणी संरक्षक भिंती मोडून पडल्या आहेत, त्यांची तातडीने दुरुस्ती हाती घेण्याच्या सूचना केल्या असल्याचे कामत यांनी सांगितले.

दरम्यान ही परिस्थिती अशीच राहिली तर पावसाळ्यात कोंब परिसर पाण्याखाली जाऊ शकतो याकडे व्हिएगस यांनी लक्ष वेधले. कुठल्याही जलस्त्रोताची व्यवस्थितरीत्या सफाई झाली नसल्याचे कुणा नागरिकांच्या लक्षात आल्यास त्यांनी आपल्या किंवा दिगंबर कामत यांच्या लक्षात हा प्रकार आणून द्यावा, असे आवाहनही त्यांनी यावेळी केले.