राजभवनाशेजारील जलवाहतूक दोन दिवस राहणार बंद

पणजी : गोव्यातील नद्यांतर्गत सुरु असणारी जलवाहतूक दोन दिवस बंद ठेवण्याचे आदेश जारी करण्यात आले आहेत. बंदर कप्तान विभागाकडून याबाबचे आदेश देण्यात आले आहेत. उपराष्ट्रपती व्यंकय्या नायडू गोवा दौऱ्यावर येणार असल्याने ही वाहतूक बंद राहणार आहे. (inland water movement in goa News Updates)

राजभवनाजवळ 500 मीटर अंतराच्या आत 3 आणि 4 मार्च असे दोन दिवस जलवाहतूक बंद ठेवण्यात येणार आहे. उपराष्ट्रपतींच्या सुरक्षेसाठी प्रतिबंधात्मक उपाय म्हणून हे आदेश जारी करण्यात आले आहेत. उपराष्ट्रपती व्यंकय्या नायडू 3 आणि 4 मार्च दरम्यान गोवा (Goa) दौऱ्यावर असतील. यावेळी ठिकठिकाणी कडेकोट बंदोबस्त ठेवण्यात येणार आहे. त्याचाच एक भाग म्हणून जलवाहतुकीवरही निर्बंध (Restrictions) लादण्यात येणार आहेत.

अत्यावश्यक सेवेतील जलवाहतुकीला मात्र या दोन्ही दिवशी परवानगी देण्यात आली आहे. असं असलं तरीही बंदर कप्तान विभाग आणि तटरक्षक दलाची करडी नजर राजभवन परिसरावर असणार आहे. आदेशाचं उल्लंघन केल्यास कडक कारवाईचा इशाराही बंदर कप्तान विभागाने दिला आहे. पंतप्रधान नरेंद्र मोदी (Narendra Modi) यांच्या म्हापशातील प्रचारसभेवेळीही अशाच प्रकारे जलवाहतुकीवर निर्बंध लादण्यात आले होते.