गोमंतकीय पोषण आहारात होतेय घुसखोरी?

पणजी: आंबाडी उड्डमेथी, वडियो किसमूर, सोया चंक चिली, सांगे सुंगटा भाजी, तिसरे सुके, सुंगटा डांगोर, टेनेरी यासह अन्‍य 108 पाककृती गोवेकरांचे पौष्टिक, पारंपरिक पदार्थ म्हणून वृत्तपत्रात (दै. गोमन्तक नव्हे) प्रसिद्ध झालेल्या जाहिराती प्रसिद्ध झाल्‍यानंतर लोकांत खळबळ माजली व चर्चेला सुरवात झाली.

राज्य सरकारच्या महिला व बाल विकास खात्याने पोषण सप्ताहाच्या सांगता दिनानिमित्त प्रसिद्ध झालेल्या या जाहिरातीतून शासकीय खात्यांचा कारभार कसा भरकटतोय हे चव्हाट्यावर आले आहे. जाहिरातीत प्रसिद्ध झालेल्या पदार्थांची नावे, अनुवाद चुकीचा आहे. तसेच चुकीच्या पाककृतींचा समावेश गोमंतकीय पारंपरिक पौष्टिक आहार म्हणून प्रसिद्ध करून चुकीचा संदेश देश, विदेशांत पोहोचविला आहे. आंबाड्यांचा समावेश पोषण आहारात होऊ शकतो. परंतु, जाहिरातीत आंबाड्याचे ‘आंबाडी’ हे नाव देण्याचा पराक्रम झाला. कांदा भज्यांचे नाव कांदा भाजी करणे, वड्यांचो रोस ‘वडयो रोस’ तर वड्यांची किसमूर ‘वडियो किसमूर’ यासारख्‍या त्रुटी आहेत.

पौष्‍टिक अन्न म्‍हणजे काय, हे आहार तज्‍ज्ञांकडे सल्लामसलत केल्‍यानंतरच समजले असते. असे काहीही प्रकार लोकांच्‍या माथी मारणे अयोग्‍य आहे.

-नीना नाईक, कार्यकर्ती, पणजी.

गोमंतकीय पोषण आहारात होतेय घुसखोरी?

• या जाहिरातीत मासळीपासून तयार करावयाच्या अधिक पदार्थांचा समावेश आहे. बांगडे, कुर्ल्या, इसवण, तिसऱ्या, सुंगटे (कोळंबी) ही मासळी गोमंतकीयांचीच नव्हे तर पर्यटकांचीही आवडती आहे. तरीही ती मासळी पोषक आहार म्हणून समाविष्ट होऊ शकत नाही.

• उलट ही मासळी किंवा त्या मासळीपासून बनविलेले पदार्थ जास्त प्रमाणात, सतत खाऊ नये म्हणून काळजी घेण्यास सांगितले जाते. गरोदरपणात महिलांनीही मासळीचे जेवण टाळावे असे बजावण्यात येते.

• चांदीसारखी पांढरी चमचम करणारी इटुकली वेर्ली, मुडदशा इत्यादी मासळी प्रामुख्याने पौष्टिक आहारात असावी, असे सांगण्यात येते.

• गोव्यातील पौष्टिक, पारंपरिक पदार्थ म्हणून प्रसिद्ध झालेल्या जाहिरातीतून तिसऱ्या, बांगडे, कुर्ल्या, माणक्याच नव्हे, तर इसवणाचे हुमण, सुके ठळकपणे दिसतात.

• पालक पनीर, पनीर तोणाक, सोया चंक चिली हे पदार्थ 108 पदार्थांत जाहिरातीत दिसतात. परंतु, ते खरोखरच गोमंतकीयांचे पारंपरिक पदार्थ आहेत का? असा प्रश्न उपस्थित होतो.

• पालक, पनीर, सोया पासून बनवलेल्या पदार्थांना गोव्यातील भोजनात अलीकडे वाढते स्थान मिळत आहे, हे वास्तव आहे. परंतु, त्यांचा पारंपरिक पदार्थांत का समावेश करावा? असाही लोकांकडून उपस्‍थित केला जात आहे.