Goa Assembly Session: गोव्यात येणाऱ्या उद्योगांना स्थानिकांना रोजगार द्यावे लागतील; उद्योगमंत्री माविन गुदिन्हो

Goa Assembly Session 2023: गोव्यात येणाऱ्या उद्योगधंद्यांना गोव्यातील स्थानिकांना रोजगार देण्यासाठी दबाव टाकला जाईल अशी माहिती, उद्योगमंत्री माविन गुदिन्हो यांनी शुक्रवारी विधानसभेत दिली.

खोर्ली येथील औद्योगिक वसाहतीत विकासाची अनेक कामे सुरू आहेत. सध्या खोर्ली औद्योगिक वसाहतीत एकूण 107 पैकी 86 युनिट सुरू आहेत तर 21 बंद अवस्थेत आहेत, अशी माहितीही मंत्री गुदिन्हो यांनी दिली.

बंद पडलेल्या उद्योगांना पुन्हा सुरू करण्यासाठी सरकार प्रयत्नशील आहे. केंद्राच्या गतीशक्ती योजनेचीही मदत त्यासाठी घेतली जाणार आहे, असेही गुदिन्हो यांनी सांगितले. औद्योगिक वसाहतीतील अतिक्रमणांचेही सर्व्हेक्षण केले जात आहे. येत्या काही काळात ती सर्व माहिती उपलब्ध केली जाईल.

स्थानिकांना रोजगार मिळावा यासाठी डिफेन्स एक्सपो साईट किटाळ येथे चांगला प्रकल्प उभारण्याची विनंती केपेचे आमदार एल्टन डिकॉस्टा यांनी केली. त्यावर उद्योगमत्री माविन गुदिन्हो यांनी आपल्याला प्रदूषण न करणारे उद्योग हवे आहेत, असे सांगत आमदारांनी याबाबत सूचना द्याव्यात, अशी माहिती दिली.

दरम्यान, कुंकळी औद्योगिक वसाहतीतील अनियमितता, प्रदूषण आणि अतिक्रमणाचा मुद्दा विरोधी पक्षनेते युरी आलेमाव यांनी उपस्थित केला.