Goa School: विद्यार्थिनीशी असभ्य वर्तन : शिक्षकावर गुन्हा

Goa School: काणकोण येथील विद्यार्थी मारहाण प्रकरण सध्या गाजत असतानाच, साखळीतील एका शाळेतील शिक्षकाचा पराक्रम समोर आला आहे. या शिक्षकाने अल्पवयीन विद्यार्थिनीशी असभ्य वर्तन केल्याचा प्रकार समोर आला आहे.

याप्रकरणी डिचोली पोलिसांनी गुन्हा नोंद केला असून, संबंधित शिक्षक अडचणीत आला आहे. हा प्रकार साखळीतील एका नामांकित शाळेत घडला आहे. आठवीत शिकणाऱ्या विद्यार्थिनीशी या शिक्षकाने ९ सप्टेंबर रोजी वर्गखोलीत असभ्य वर्तन केले.

शिक्षकाने विद्यार्थिनीला ढकलल्याने ती जमिनीवर पडून तिच्या पायाला जखम झाली, अशी तक्रार विद्यार्थिनीच्या आईने डिचोली पोलिसांत नोंदवली आहे. याप्रकरणी पोलिसांनी आज (शनिवारी) ‘भादंसं’च्या ३४३ आणि बाल हक्क कायद्याच्या ८ कलमाखाली गुन्हा नोंद केला आहे. डिचोली पोलिस ठाण्याचे निरीक्षक राहुल नाईक यांच्या मार्गदर्शनाखाली उपनिरीक्षक प्रसाद पाळणी पुढील तपास करत आहेत.