गोव्यातील वीज दरवाढीमुळे नागरिक त्रस्त

पणजी: वीज खात्याने साधन-सुविधा, व्यवस्थापनावरील वाढता खर्च लक्षात घेत वीज दरात वाढ केली असून याचा फटका सर्वसामान्य नागरिकांना बसत आहे. या निर्णयाची अंमलबजावणी 1 जूनपासून करण्यात आली आहे.

घरगुती वापरातील कमी दाबाच्या विजेसाठी प्रती युनिट 5 पैसे, तर व्यावसायिक वापरात येणाऱ्या कमी दाबाच्या विजेसाठी तसेच उच्च दाब घरगुती, व्यावसायिक, औद्योगिक वापरासाठी प्रती युनिट 8 पैसे वाढवण्यात आले आहेत. नागरिकांनी याबाबत असंतोष व्यक्त केला आहे. सर्व गोष्टी महाग झाल्या असताना आता वीज दरवाढीमुळे लोकांचे बजेट कोलमडले आहे.

दारिद्र्य रेषेखालील ग्राहकांना या दरवाढीतून वगळण्यात आले आहे, तर शेतीसाठी वीज वापरासाठी 5 पैसे प्रती युनिट वाढ झाली आहे. याबाबत अधिसूचना जारी झाली आहे.