House Collapses At Margao: जोरदार पावसामुळे घरे कोसळण्‍याच्‍या घटना सुरूच

मडगाव: मागचा आठवडाभर पडत असलेल्‍या जोरदार पावसामुळे अनेक जुनी मातीची घरे कोसळली असून येथील जुन्‍या बाजारातील एका जुन्‍या घराची भिंतही काल कोसळून पडण्‍याची घटना घडली.आतापर्यंत मडगाव आणि जवळच्‍या परिसरात आठ घरांची पडझड झाल्‍याची नोंद आहे.

काल ज्‍या घराची भिंत पडली त्‍याच्‍या मातीमुळे पाणी वाहून जाण्‍याची वाट बंद झाल्‍याने आणखी गंभीर स्‍थिती उद्‍भवली होती. मात्र सासश्‍‍टीचे मामलेदार प्रतापराव गावकर यांनी तातडीने घटनास्‍थळी धाव घेऊन ती माती दूर केली. या पडझड झालेल्‍या घरामुळे अन्‍य घरांनाही धोका असल्‍यामुळे या घरमालकाला लवकरच नोटीस बजावण्‍यात येणार असल्‍याची माहिती मामलेदार कार्यालयातून प्राप्‍त झाली आहे.

दरम्‍यान, पावसामुळे ठिकठिकाणी दरडी कोसळण्‍याच्‍या घटना घडल्‍या असून मोती डोंगराच्‍या पायथ्‍याशी असलेल्‍या घरांना त्‍यामुळे धोका निर्माण झाला आहे. या पायथ्‍याशी असलेली बहुतेक घरे बेकायदेशीर असून या घरांवर कारवाई केली जावी अशी मागणी केली जात आहे.