कुठ्ठाळीत सांडपाणी प्रक्रियेसाठी प्रकल्पाचा शुभारंभ; आमदार आंतोन वास यांचे इतर पंचायतींना आवाहन

कुठ्ठाळी मतदारसंघातील सांडपाणी समस्या सध्या चर्चेचा विषय बनले आहे. यावर कुठ्ठाळीचे आमदार आंतोन वास म्हणाले की, कुठ्ठाळी मतदारसंघातील सांडपाणी समस्या सोडविण्यासाठी पंचायतीने पुढे यावे. पंचायतींनी जागेची निवड केल्यास तेथे स्वच्छ भारत अभियान 2.0 अंतर्गत सांडपाणी प्रक्रिया प्रकल्प उभारण्यात येईल.

कुठ्ठाळी पंचायतीच्या किलपाऊलो-केसरव्हाळ भागात स्वच्छ भारत अभियान 2.0 अंतर्गत सांडपाणी प्रक्रिया प्रकल्प उभारण्याच्या कामाचा शुभारंभ आमदार वास यांच्या हस्ते करण्यात आला. सदर प्रकल्प लहान असून त्यासाठी सुमारे 55 लाख रुपये खर्च करण्यात येणार आहेत.

कुठ्ठाळी मतदारसंघातील हा पहिलाच सांडपाणी प्रक्रिया प्रकल्प आहे. इतर पंचायत क्षेत्रातही अशा प्रकारचे प्रकल्प उभारण्यासाठी प्रयत्न करण्यात येतील. तिथे जागेची अडचण असल्याने प्रकल्प उभारण्यास अडथळे येतात. पंचायतींनी जागा दिल्यास तिथेही असे प्रकल्प उभारण्यात येतील, असे वास यांनी स्पष्ट केले.

सरपंच सेनिया परेरा यांनी सांगितले की, सांडपाणी प्रक्रिया प्रकल्प नसल्याने नागरिक सांडपाणी थेट गटारामध्ये सोडतात. या प्रकल्पामुळे ती समस्या दूर होण्यास मदत होईल. जे नागरिक गटारामध्ये सांडपाणी सोडतात, त्यांचे वीज, पाणी जोडणी कापण्यात येते; पण ती दोन दिवसांमध्ये पुन्हा कोणीतरी जोडून देण्याचे प्रकार पूर्वी होत असे.

परंतू आता जोपर्यंत संबंधित व्यक्ती सांडपाण्याची योग्य विल्हेवाट लावण्यासाठी सुविधा निर्माण करीत नाही तोपर्यंत वीज,पाणी जोडणी जोडली जात नसल्याचे त्यांनी स्पष्ट केले.