शिरोलीत ‘करवली’ उत्सव उत्साहात

पर्ये: शिरोली, केरी-सत्तरी येथे शिगमोत्सवाला प्रारंभ झाला असून सर्वदूर प्रसिद्ध असलेला दोन दिवशीय ‘करवली’ उत्सव उत्साहात पार पाडला.शिरोलीच्या शिगमोत्सवाची सुरुवात होळी पौर्णिमेच्‍या दिवशी संध्याकाळी राखण्याची होळी व मुख्य होळी तोडून होते. दुसऱ्या दिवशी सकाळी होळी गावातील देवळाकडे आणून आंब्याच्या पानांनी सजवून तिची पूजा केली जाते. त्यानंतर ढोलताशांच्या गजरात होळी उभारण्यात येते व विविध धार्मिक विधी झाल्यानंतर होळीवर नारळ फोडले जातात. याच दिवशी संध्याकाळी ‘चोरोत्सव’ साजरा होतो. त्यानंतर तिसऱ्या व चौथ्या दिवशी ‘करवली उत्सव’ होतो. (Goa Festival News Updates)

असे असते उत्‍सवाचे स्‍वरूप

देवीच्या दोन करवली (लहान मुले स्त्री वेशात) संपूर्ण गावात घरोघरी जातात. प्रत्येक घरी करवल्यांची पूजा करून ओटी भरली जाते. यावेळी रोंबाट नाचवले जाते व जाणकारांकडून गायन केले जाते. शिरोली गाव करवली उत्सवासाठी प्रसिद्ध असून येथील कलाकार मोठ्या उत्साहात सकारती गायन करतात. यंदाही सकारती गायन करण्यात आले. शिरोलीतील करवली उत्सवाला केरी, घोटेली आणि पंचक्रोशीतील नागरिक तसेच लोककला अभ्यासक उपस्थिती लावतात.