Illegal Bike Race: गोव्यात तरूणांची रस्त्यावर खुलेआम जीवघेणी बाईक रेस; पोलिस, प्रशासनाचे अक्षम्य दुर्लक्ष

Illegal Bike Race एकीकडे गोवा पोलीस वाहतुकीचे नियम तयार करून रस्ते अपघात रोखण्यासाठी आटोकाट प्रयत्न करत असताना दुसरीकडे मात्र बेकायदेशीररीत्या दुचाकींची शर्यत लावून जीवाशी खेळ खेळाला जात असल्याचा प्रकार सुरु आहे. नुवे येथे एका बेकायदेशीर दुचाकी शर्यतीचा व्हिडीओ सध्या सोशल मीडियावर चांगलाच व्हायरल होताना दिसतोय.

सदर व्हिडिओत भर रस्त्यावर दुचाकी शर्यतींचे आयोजन केले गेले असून दोन दुचाकीस्वार भरधाव वेगात दुचाकी शर्यतीमध्ये पळवत आहेत. मुख्य म्हणजे यातील एकाही दुचाकीस्वराच्या डोक्यावर ना हेल्मेट आहे ना शर्यतीकरिता सुरक्षिततेच्या दृष्टीने वापरण्यात येणारी साधने. अशा धोकादायक परिस्थितीत हे दुचाकीस्वार वेगात दुचाकी पळवताना दिसत आहेत.

या रेसचे आयोजन कुणी केले होते? याबाबत अद्याप माहिती प्राप्त झाली हाती. काही कालावधीपूर्वी म्हापसा येथे बाईक रेसचे आयोजन करण्यात आले होते. या स्पर्धेत प्रात्यक्षिक करताना झालेल्या अपघातात एका मोटरसायकल स्वार स्पर्धकाचा दुर्दैवी मृत्यू झाला होता.