Mapusa Police Station: नादुरुस्‍त वाहनांमुळे म्‍हापशात डोकेदुखी

उत्तर गोव्यातील सर्वांत महत्त्‍वपूर्ण पोलिस स्‍थानक म्‍हणजे म्‍हापसा पोलिस स्‍थानक. विशेष म्‍हणजे या पोलिसस्‍थानकाच्‍या परिसरात अशी जप्‍त केलेली अनेक नादुरुस्‍त वाहने गेल्‍या अनेक वर्षांपासून पडून आहेत, ज्‍यामुळे डोकेदुखी वाढली आहे.

ही वाहने गंजत पडली असून सरपटणाऱ्या प्राण्‍यांसाठी ती आश्रयस्‍थान ठरत आहेत. शिवाय डासांच्‍या पैदासीला कारणीभूत ठरत आहेत. त्‍यामुळे या वाहनांची तातडीने विल्‍हेवाट लावावी, अशी मागणी केली जात आहे.

म्हापसा पोलिस स्थानकावर दिवसाकाठी मोठ्या संख्‍येने अपघातग्रस्‍त वाहने आणली जातात आणि ती नंतर वर्षोनुवर्षे तशीच पडून असतात. अशी वाहने ठेवायला जागासुद्धा अपुरी पडते. दुसरी गोष्‍ट म्‍हणजे दररोज येणारे लोकही आपली वाहने घेऊन येतात. त्‍यामुळे वाहनांची गर्दी होते.

अपघातात सापडलेली वाहने आहेत तशीच वाहनचालकांनी दंड न भरल्याच्या कारणास्तव आणून ठेवलेली वाहनेही आहेत. त्यामुळे ही अनेक वर्षांची वाहने गंजत पडली आहेत. पोलिस स्थानकाच्या मागच्या बाजूला तर मोठ्या प्रमाणात वाहने उभी करून ठेवण्यात आलेली आहेत. या स्थानकातच पोलिस व वाहतून पोलिस गुप्तचर कार्यालय आहे. येथील अधिकारी, त्यांचे इतर सहकारी आपली दुचाकी, चारचाकी वाहने घेऊन येतात.

निखिल पालेकर, पोलिस निरीक्षक (म्‍हापसा)

ही वाहने अपघातात सापडलेली तसेच दंड न भरल्याने जप्‍त करण्‍यात आलेली आहेत. वाहनचालकांना अनेक वेळा आपली वाहने नेण्यास सांगितले जाते, तरीसुद्धा ती नेली जात नाहीत. ही वाहने इतरत्र कुठे नेऊन ठेवायची म्हटल्यास आमच्याकडे जागा नाही. आता योग्य वेळी या वाहनांचा लिलाव केला जाईल.