Mapusa: वादग्रस्त शेड विरोधात कोर्टात जाणार; गैरप्रकार असल्याचा दावा

दत्तवाडी, म्हापसा येथील स्मशानभूमी शेजारील खुल्या कोमुनिदाद जागेत वादग्रस्त वर्कशॉप उभारण्यासाठी पोलादी शेडचे बांधकाम सुरू आहे. मात्र, या व्यावसायिकरणाला स्थानिक सामाजिक कार्यकर्ते संजय बर्डेंनी तीव्र आक्षेप घेतला. हा गैरप्रकार असून याविरोधात आठवड्याभरात आपण उच्च न्यायालयात याचिका दाखल करणार आहे, असेही त्यांनी स्पष्ट केले.

शुक्रवारी (ता.१९) म्हापशात आयोजित पत्रकार परिषदेत ते बोलत होते. यावेळी अनिल केरकर, संजू तिवरेकर, सीतेश मोरे, अजित च्यारी हजर होते.

संजय बर्डे म्हणाले की, ही जागा कोमुनिदादची असून त्यांनी सामाजिक कार्य म्हणून म्हापसा ग्रामस्थ हिंदू सभा या समितीस दिली. अशावेळी या समितीला ही जागा परस्पर दुसऱ्या कुणालाच भाडेतत्त्वावर देता येत नाही. तरीही, ती एका लोकप्रतिनिधीची भागिदारी असलेल्या कंपनीस वर्कशॉप उभारण्यासाठी दिली.ही जागा २२,३०० चौ.मी. आहे. मात्र जागेचे पार्टिशन झालेले नाही. तसेच संबंधितांनी १५०० चौ. मी. जागेसाठी सनद मिळविली, असा आरोपही त्यांनी केला.