Navelim: बेकायदेशीर टॉवर हटवा; बेले-नावेलीत कारवाईसाठी जिल्हाधिकाऱ्यांना निवेदन

मडगाव: बेले-नावेली येथील मोबाईल टॉवरची उभारणी ही नियमांची पायमल्ली करून करण्यात आलेली आहे. या टॉवरला यापूर्वीही लोकांनी विरोध केलेला असून लोकांच्या विरोधानंतरही सर्व नियम धाब्यावर बसवून केलेली ही उभारणी बेकायदेशीर आहे. हा टॉवर हटवावा, अशी मागणी प्रतिमा कुतिन्हो यांनी दक्षिण गोवा जिल्हाधिकाऱ्यांकडे निवेदनाद्वारे केली.

यावेळी ग्रामस्‍थ मोठ्या संख्‍येने उपस्‍थित होते. कुतिन्हो यांनी पत्रकारांशी बोलताना सांगितले की, हा मोबाईल टॉवर राष्ट्रीय महामार्गाच्या अगदी जवळ उभारण्यात आलेला आहे. त्‍यास नागरिकांचा विरोध आहे. काम सुरू करताना हायमास्ट दिव्याची उभारणी केली जात असल्याचे सांगून लोकांची दिशाभूल करण्यात आली. मात्र, आता सत्‍य बाहेर आले आहे.

नियमांचे उल्लंघन करत उभारणी

या मोबाईल टॉवरची उभारणी ही निवासी घरांपासून दूर होण्याची गरज आहे. त्यासाठी नियम आहेत. संबंधित मोबाईल कंपनीकडून ३१ मीटरच्या अंतरात ३ अँटिना असलेल्या मोबाईल टॉवरची उभारणी करण्यात आली आहे. त्या ठिकाणी केवळ एकाच अँटिनाला परवानगी मिळू शकते.

पण, येथेही नियमांचे उल्लंघन करण्यात आलेले आहे. त्यामुळे नियमांचे उल्लंघन करत उभारण्यात आलेल्या या मोबाईल टॉवरवर १५ दिवसांत कारवाई करावी, अशी मागणी दक्षिण गोवा जिल्हाधिकाऱ्यांकडे निवेदनाद्वारे केलेली आहे, असे कुतिन्हो यांनी पत्रकारांशी बोलताना सांगितले.