Mining: सिंधुदुर्गातील 'ते' खनिज गोव्यात? उपग्रह छायाचित्रांच्या आधारे तक्रार, चौकशीची मागणी

पणजी: सिंधुदुर्ग जिल्ह्यातील तळवणे-कोंडुरा परिसरातून मोठ्या प्रमाणावर खनिजयुक्त मातीचे बेकायदा उत्खनन करून ती गोव्यात पाठवली जात असल्याचा गंभीर आरोप पर्यावरणवादी नेते डॉ. जयेंद्र परुळेकर यांनी केला आहे.

गुगल अर्थवरील उपग्रह छायाचित्रांचा आधार घेत त्यांनी सिंधुदुर्ग जिल्हा प्रशासन, खनिकर्म विभाग आणि महसूल विभागाच्या भूमिकेवर प्रश्नचिन्ह उपस्थित केले असून याप्रकरणाची उच्चस्तरीय चौकशी करण्याची मागणी केली आहे.

डॉ. परुळेकर यांनी प्रसिद्धीपत्रकातून म्हटले आहे की, गेल्या काही दिवसांपासून कुडाळ तालुक्यातील झाराप रेल्वे स्थानकावरून मोठ्या प्रमाणावर खनिजसदृश माती वास्को (गोवा) येथे रेल्वेमार्गे पाठवली जात आहे.

या मातीचा उगम नेमका कुठे आहे आणि तिचे उत्खनन कायदेशीर पद्धतीने करण्यात आले आहे का? याबाबत गंभीर शंका उपस्थित होत आहेत. सुरवातीला ही माती आडाळी परिसरातील असल्याचा संशय व्यक्त केला जात होता. मात्र, गुगल अर्थच्या सॅटेलाईट छायाचित्रांच्या पाहणीत तळवणे-कोंडुरा परिसरातील डोंगर मोठ्या प्रमाणावर पोखरण्यात आल्याचे दिसून येत असल्याचा दावा त्यांनी केला आहे.

त्यांच्या म्हणण्यानुसार, गेल्या दहा ते बारा दिवसांत झाराप रेल्वे स्थानकावरून आठ ते दहा मालगाड्या भरून ही माती गोव्यात पाठविण्यात आली आहे. या वाहतुकीसाठी दररोज सुमारे ५०० हून अधिक डंपर्सचा वापर होत असल्याचे सांगितले जात आहे. इतक्या मोठ्या प्रमाणावर वाहतूक सुरू असताना संबंधित विभागांना याची माहिती नसणे अशक्य असल्याचे मतही त्यांनी व्यक्त केले.

आरोपांतील प्रमुख मुद्दे!

तळवणे-कोंडुरा परिसरात मोठ्या प्रमाणावर उत्खनन सुरू असल्याचा दावा .गुगल अर्थच्या सॅटेलाईट छायाचित्रांत डोंगर पोखरल्याचे दिसत असल्याचा आरोप .झाराप रेल्वे स्थानकावरून १० ते १२ मालगाड्यांमधून माती गोव्यात पाठवल्याचा दावा.दररोज ५०० ते ६०० डंपर्सद्वारे वाहतूक होत असल्याचा उल्लेख.