Illegal Houses In Aldona: हळदोणातील 60 बेकायदा घरांवर चालणार बुलडोझर, समिती ठाम; प्रसंगी कोर्टात जाण्याची तयारी!

म्हापसा: हळदोणा पंचायत क्षेत्रातील रामतळे व साईनगर परिसरात कोमुनिदादच्या जागेत बेकायदा उभारलेल्या ६० घरांवर सर्वोच्च न्यायालयाच्या आदेशानुसार कारवाई केली जाईल, अशी माहिती बोआ इस्पेरेन्सा दि हळदोणा या कोमुनिदादचे अध्यक्ष मॅल्वीन फर्नांडिस यांनी दिली आहे.

कोमुनिदादची नूतन समितीची निवड झाल्यानंतर त्यांनी ही माहिती दिली. यावेळी कोमुनिदादचे सदस्य मेलरॉय फेर्रांव अटर्नी, सावियो फर्नांडिस, बेंजामीन आल्फोंसो तसेच इतर सदस्य उपस्थित होते. निवडणूक (Election) अत्यंत शांतपणे झाल्याचे ते म्हणाले.

प्रसंगी न्यायालयात

घर कितीही जुने असले तरी त्यावरील कारवाई अटळ आहे. उभारलेल्या या घरांना ना हरकत दाखला कोमुनिदादकडून देण्यात आलेला नाही. प्रसंगी सर्वोच्च न्यायालयात (Supreme Court) जाण्याची तयारी ठेवली आहे. घरांवर कारवाई करताना तेथील मंदिराला हात लावला जाणार नाही. एका घरावर कारवाई केल्यानंतर सर्व घरांवर कारवाई केली जाईल, असेही ते म्हणाले.