म्हापशात रातोरात उभारला बेकायदा गाडा

म्हापसा : येथील नवीन बस स्थानकाशेजारीच रातोरात नवीन गाडा बेकायदेशीररित्या उभारल्याने आश्‍चर्य व्यक्त करण्यात येत आहे. नवीन कदंब बस स्थानकाच्या बाजूला मोकळ्या जागी पदपथाच्या बाजूला हा गाळा उभा केला आहे. कोमुनिदादच्या जागी मोकळ्या ठिकाणी हा गाळा आणून ठेवला असल्यामुळे कोमुनिदाद समिती व पालिका मंडळाच्या वरदहस्तानेच हा गाळा उभारल्याचा संशय स्थानिक रहिवाशांनी व्यक्त केला आहे.

म्हापसा पालिका मंडळ हे नेहमीच शहरातील बेकायदा अतिक्रमणावरून चर्चेत असते. आता म्हापसा-गिरी रस्त्याच्या बाजूने आलेल्या या नवीन गाळ्यामुळे पुन्हा पालिका मंडळ चर्चेत आले आहे. यापूर्वी अशाच प्रकारे दत्तवाडी तसेच खोर्ली भागात गाळेवजा दुकानांवरून गदारोळ झाला होता. शिवाय तत्कालीन पालिका मंडळाच्या बैठकीत बेकायदा गाळ्यांवरून नगरसेवक एकमेकांना लक्ष्य करत होते.

याआधीही म्हापशातील गावसावाडा येथील शेतजमीन बुजवून तिथे बेकायदेशीर गाळेवजा दुकान थाटण्यात आले होते. यासंबंधी स्थानिक नगरसेवकांनी केलेल्या तक्रारीकडे पालिकेने दुर्लक्ष केल्याचा आरोप करण्यात आला होता.

राष्ट्रीय महामार्गाच्या नजीक म्हापसा नदीकिनारील खारफुटीची झाडे कापून मोठ्या प्रमाणात ही शेतजमीन बुजविण्यात आली होती. या प्रकरणी वेळोवेळी स्थानिकांनी तसेच विरोधी गटनेत्यांनी आवाज उठविला होता. तरीही म्हापसा पालिका किंवा संबंधितांकडून कारवाई करण्यात आली नव्हती.