Anjuna News: पोलिस बंदोबस्तात हणजुणेतील बेकायदा गाळा पाडला

हणजुणे - कायसुव पंचायत क्षेत्रातील प्रभाग क्रं. ११ तसेच सर्वे क्रं. १३२/१२ मधील रॉयसी फर्नांडिस यांच्या मालकीचा बेकायदेशीर कार्यरत असलेला गाळा सोमवारी बार्देश तालुक्याचे दंडाधिकारी गौरीश नाईक यांच्या उपस्थितीत पाडण्यात आला.

हा गाळा पाडण्याचे आदेश याआधीच उच्च न्यायालयाकडून देण्यात आले होते व त्यानुसार गाळ्याला संबंधित अधिकाऱ्यांनी सील ठोकले होते.

दरम्यान, गाळ्याचे मालक रॉयसी फर्नांडिस कायद्याचे उल्लंघन करून गाळा चालवत असल्याची माहिती मिळाल्यानंतर सोमवारी दुपारी सर्व सोपस्कार पूर्ण करून पोलिस बंदोबस्तात हा गाळा पोकलीनच्या साहाय्याने पाडण्यात आल्याची माहिती बार्देशचे संयुक्त दंडाधिकारी गौरीश नाईक यांनी दिली. यावेळी हणजुणे पोलिस स्थानकाचा पोलिस फौजफाटा घटनास्थळी दाखल होता.