Corporation Of The City Of Panaji: सांतिनेजमधील ‘वाय’ मार्गावरील शीतल हॉटेलशेजारी रस्ता रुंदीकरणात गेलेल्या आणि महानगरपालिकेचा परवाना नसलेल्या एका दुकानाच्या मालकाने सर्व कायद्यांना कोलदांडा दाखविला आहे.
महानगरपालिकेने काम थांबविण्याचे आदेश दिलेली नोटीस फाडून या दुकानमालकाने नूतनीकरणाचे काम दांडगाईने सुरू केले आहे.
महानगरपालिका रस्त्याच्या बाजूला बसणाऱ्या विक्रेत्यांवर कारवाई करण्यासाठी धावत असते; पण बेकायदेशीर बांधकाम करणाऱ्या या दुकानदारांवर कारवाई करण्याची हिंमत दाखवत नाही.
महागरपालिकेने पाठविलेल्या निरीक्षकालाही हा मालक आता जुमानत नाही. सर्व नियम आणि कायदे फक्त गरिबांसाठी असतात, ते उगाच म्हणत नाहीत. या इमारत मालकाला राजकीय वरदहस्त असल्याने तो महापालिकेचेही ऐकत नसल्याचे स्पष्ट आहे.
विशेष बाब म्हणजे ही जागा रस्ता रुंदीकरणात गेलेली आहे, त्याचवेळी महापालिकेने कारवाई करून तो रस्ता रुंद करायला हवा होता. परंतु आता त्याच्यासाठी म्हणे आहे तसाच मार्ग ठेवण्यासाठी काहीजण राजकीय स्तरावरून प्रयत्न करीत आहेत.
नगरसेवकाची भूमिका संशयास्पद
महानगरपालिकेच्या बोटचेपेपणामुळे असे धनदांडगे कायद्याला जुमानत नाहीत. एकाला एक न्याय आणि दुसऱ्याला दुसरा न्याय, असा संदेश महानगरपालिका देतेय असे वाटते.
विशेष बाब म्हणजे एकही नगरसेवक या बेकायदा बांधकामाबाबत गेल्या बैठकांमध्ये बोललेला नाही. त्यामुळे ज्या नगरसेवकाच्या प्रभागात हे काम सुरू आहे, त्या नगरसेवकाची भूमिकाही संशयास्पद वाटते.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
