Club Tao Demolition: बेकायदा ‘क्लब ताओ’वर हातोडा; कळंगुट पंचायत ॲक्शन मोडवर

कळंगुट: कळंगुट -बागा रस्त्यावर गेले अनेक महिने बेकायदा कार्यरत असलेल्या ‘क्लब-ताओ’ वर न्यायालयाच्या आदेशानुसार कळंगुट पंचायत मंडळाने सोमवारी पाडण्याची कारवाई केली. यावेळी उत्तर गोवा उप-जिल्हाधिकारी, बार्देश तालुका दंडाधिकारी तसेच बार्देश तालुका गट विकास अधिकारी तसेच पंचायत सचिव अर्जुन वेळीप उपस्थित होते.

दरम्यान, कळंगुट पोलिस पथक क्लबवर पाडण्याची कारवाई होईपर्यंत परिसरात कडक पहारा ठेवून होते. दरम्यान, कळंगुट व परिसरात बेकायदा कार्यरत असलेल्या नाईट क्लबवर कायद्यानुसार वेळोवेळी कारवाई करण्यास सज्ज असून सोमवारी पाडण्यात आलेल्या बेकायदा क्लब- ताओ या नाईट क्लबसंबंधात पर्यटक तसेच स्थानिकांकडून अनेक तक्रारी पंचायत मंडळाकडे दाखल करण्यात आल्या होत्या.

या सर्व तक्रारींना अनुसरून दाखल तक्रारीनुसार शेवटी आज न्यायालयाच्या आदेशानुसार ही कारवाई करण्यात आल्याचे पंचायत सचिव अर्जुन वेळीप यांनी यावेळी स्थानिक प्रसार माध्यमांशी बोलताना सांगितले.