IFFI 2025: 'इफ्फी' परेडमुळे पणजीत अर्धा दिवस सुट्टी! सरकारी कार्यालये आणि स्वायत्त संस्था दुपारनंतर बंद

पणजी: गोव्यात २० नोव्हेंबरपासून सुरू होणाऱ्या आंतरराष्ट्रीय चित्रपट महोत्सवाच्या (IFFI) ५६ व्या आवृत्तीच्या उद्घाटन सोहळ्याच्या निमित्ताने राज्य सरकारने महत्त्वपूर्ण निर्णय घेतला आहे. उद्घाटनाच्या दिवशी, म्हणजेच गुरुवारी (दि.२०) पणजी शहर मर्यादेतील सर्व सरकारी कार्यालये आणि स्वायत्त संस्थांना दुपारनंतर अर्ध्या दिवसाची सुट्टी जाहीर करण्यात आली आहे.

परेडसाठी विशेष व्यवस्था

सामान्य प्रशासनाने याबाबतचा आदेश जारी केला आहे. यावर्षी इफ्फीचा उद्घाटन सोहळा दरवर्षीप्रमाणे बांबोळी येथील डॉ. श्यामाप्रसाद मुखर्जी इनडोअर स्टेडियमवर न होता, तो पणजीतील जुन्या गोमेकॉ (Old GMC) इमारतीच्या समोर होणार आहे. या दिवशी भव्य परेडचेही आयोजन करण्यात आले आहे.

वाहतूक आणि सुरक्षेसाठी निर्णय

या सुट्टीमागचे कारण स्पष्ट करताना सरकारने सांगितले की, २० नोव्हेंबर रोजी होणाऱ्या उद्घाटन परेडमुळे सामान्य जनतेची गैरसोय टाळण्यासाठी, पणजी शहरात होणारी वाहतूक कोंडीमी करण्यासाठी आणि परेड व सुरक्षा व्यवस्थेचे सुरळीत आयोजन सुनिश्चित करण्यासाठी हा निर्णय घेण्यात आला आहे. यामुळे पणजीतील सरकारी कर्मचारी आणि स्वायत्त संस्थांमधील कर्मचाऱ्यांना इफ्फीच्या उद्घाटन सोहळ्याचा उत्साह अनुभवता येईल.

गोव्यातील चित्रपटांना विशेष संधी

गोव्याचे मुख्यमंत्री डॉ. प्रमोद सावंत यांनी सांगितले की, यंदा महोत्सवात 'क्लाउडिया' आणि 'द पायलट' हे गोवन चित्रपट प्रदर्शित केले जातील. याशिवाय, स्थानिक चित्रपटांसाठी असलेल्या विशेष विभागात आणखी पाच गोव्यातील चित्रपटांची निवड करण्यात आली आहे.