Subhash Phaldesai: मोबाईलचे दुष्परिणाम ओळखाः सुभाष फळदेसाई

Subhash Phaldesai: जीवनात यशस्वी व्हायचे असल्यास विद्यार्थ्यांनी ध्येय निश्चित करायला पाहिजे. अनुकरण न करता, ध्येयप्राप्तीसाठी मेहनत घेणे तेवढेच गरजेचे आहे. मोबाईलच्या अति आणि गैरवापरामुळे अनेक संकटांचा सामना करावा लागत असतो. मोबाईलच्या अतिरेकापासून भविष्यातील दुष्परिणाम विद्यार्थ्यांनी जाणून घेतले पाहिजे.

त्याबाबतीत पालकांनीही जबाबदारी स्वीकारायला हवी, असे मत समाजकल्याण खात्याचे मंत्री सुभाष फळदेसाई यांनी व्यक्त केले.

शिक्षा व्हिजन डिचोलीतर्फे आयोजित विद्यार्थी अभिनंदन सोहळ्यात मंत्री फळदेसाई प्रमुख पाहुणे या नात्याने बोलत होते. विद्यार्थ्यांनी आपल्या भवितव्याचा विचार करून मोबाईलचा केवळ शिक्षणापुरताच वापर करावा, असे आवाहनही सुभाष फळदेसाई यांनी केले.

रविवारी (ता.२२) मुळगाव येथे आयोजित या सोहळ्याप्रसंगी शिक्षा व्हिजनचे अध्यक्ष तथा आमदार डॉ. चंद्रकांत शेट्ये यांच्यासह जिल्हा पंचायत सदस्य प्रदीप रेवोडकर, संस्थेचे उपाध्यक्ष डॉ. दिनेश आमोणकर,

मुळगावच्या सरपंच तृप्ती गाड, साळच्या सरपंच सावित्री घाडी, मेणकुरेचे सरपंच गुरुदास परब, अडवलपालचे सरपंच गजानन पालकर, लाटंबार्सेचे सरपंच पद्माकर मळीक यांच्यासह विविध पंचायतींचे पंचसदस्य उपस्थित होते.

मुळगाव, साळ, मेणकुरे, अडवलपाल आणि लाटंबार्से पंचायत क्षेत्रातील दहावी, बारावी, पदवी आणि पदव्युत्तर परीक्षेतील १०८ गुणवंत विद्यार्थ्यांचा मान्यवरांच्या हस्ते गौरव करण्यात आला. पीएचडी मिळवलेले प्रा. दत्ता परब यांचाही यावेळी सत्कार करण्यात आला. डॉ. दिनेश आमोणकर यांनी स्वागत केले.