सांगे : सांगे मतदारसंघातील जनतेने गेल्या पाच वर्षांत आपल्याला भरभरून प्रेम दिले. आपले कार्यही लोकांनी पाहिले आहे. त्‍यामुळे आता निवडणुकीच्‍या निमित्ताने प्रचारासाठी लोकांच्‍या दारात गेल्यानंतर होणारे भव्‍य स्वागत असेल किंवा खेड्यापाड्यात मिळत असलेल्‍या उदंड प्रतिसाद पाहता आपला विजय हा काळ्‍या दगडावरची रेघ आहे. आता फक्त लढाई आहे ती अधिकाधिक मताधिक्‍क्य प्राप्त करण्यासाठी. जनतेच्या आशीर्वादाने ही लढाईही जिंकेन, असा आत्मविश्वास अपक्ष उमेदवार सावित्री कवळेकर (Savitri Kavalekar) यांनी व्‍यक्त केला.
कोंगारे-भाटी येथील कोपरा बैठकीत सावित्री बोलत होत्‍या. यावेळी व्यासपीठावर चंदन उनंदकर, नवनाथ नाईक, चंद्रकांत गावकर, नानू भांडोळकर, चांगुणा साळगावकर, माजी उपसरपंच आर्यकुमार जांबवलीकर, जानू झोरे, कुष्ठ गावकर आणि प्रमुख कार्यकर्त्यांची उपस्‍थिती होती.
सांगेचा (Sanguem) विकास केला असेल तर मग अद्यापही पाणी समस्या, नेटवर्क, रोजगार, नोकऱ्या, आरोग्य सेवा या समस्या लोकांना का भेडसावत आहेत? सांगे टँकरमुक्त का झाला नाही? असे प्रश्‍‍न सावित्री यांनी यावेळी उपस्‍थित केले. तसेच ज्यांनी लोकांना फसविले, त्यांना या निवडणुकीत (Election) लोकच फसविणार असल्याचे सांगून आपल्या ‘कपाट’ या निशाणीवर शिक्का मारून बहुसंख्‍य मतांनी निवडून देण्याचे आवाहन केले.
चंदन उनंदकर म्हणाले की, आम्ही सर्वांना संधी दिली. पण काहींना त्या संधीचे सोने न करता माती केली. म्हणूनच सांगेतील जनता यावेळी महिला लोकप्रतिनिधी म्हणून सावित्री कवळेकर यांना आपल्या पाठिंबा देऊ लागली आहे. विरोधक अफवा निर्माण करतात. त्यांच्यावर विश्‍‍वास ठेवू नका.
यावेळी आर्यकुमार जांबावलीकर, महेश गावकर, नवनाथ नाईक यांनीही सावित्री कवळेकर निवडून येणार असल्याचा दावा केला. मनोज पर्येकर यांनी सूत्रसंचालन केले तर त्‍यांनीच स्वागत करून शेवटी आभार मानले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
