शांतीनगर वास्को येथे पतीने डोक्यावर लोखंडी रॉडने वार करून पत्नीचा खून केल्याची घटना घडली आहे. या प्रकरणी संशयिताला वास्को
पोलिसांनी अटक केली आहे. शांतीनगर वास्को येथील रहिवाशी चाळोबा केसरकर याने आपली पत्नी वैशाली (वय ३९) हिच्या डोक्यावर लोखंडी रॉडने वार करून हत्या केली. ही घटना आज (दि. २४ मे) दुपारी दीडच्या दरम्यान घडली.
मिळालेल्या माहितीनुसार, चाळोबा व त्याची पत्नी वैशाली यांच्यात गेल्या तीन वर्षांपासून खटके उडत होते. चाळोबा आपल्या पत्नीला मारबडव करत होता, असे वैशालीच्या वडिलांनी सांगितले.
तसेच बरे वाईट काही घडू नये म्हणून वडील स्वतः तिच्या घरात जाऊन रात्री झोपत होते. वैशालीला एक मुलगा असून यंदा तो दहावीत उत्तीर्ण झाला आहे.
आज दुपारी पती - पत्नीमध्ये जोराचे भांडण झाले. त्यात चाळोबाने वैशालीच्या डोक्यावर रॉडने वार केला. ती रक्ताच्या थारोळ्यात जमिनीवर कोसळली व तिचा जागीच मृत्यू झाला. हे कृत्य करून नवरा तसाच घरीच राहीला.
शेजाऱ्यांनी आरडाओरड ऐकून त्यांच्या घरात प्रवेश केला असता वैशालीचा खून झाल्याचे उघडकीस आले. वास्को पोलिस स्थानकाचे पोलिस निरीक्षक कपिल नायक व इतर पोलिस घटनास्थळी दाखल झाले व संशयिला ताब्यात घेऊन नंतर त्याला अटक केली. वास्को पोलिस पुढील तपास करीत आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.